Dünya yeni mərhələyə keçir – BMT rəhbəri mümkün təhlükələrdən danışdı
Dünya qaçılmaz olaraq çoxqütblü sistemə doğru irəliləyir, lakin bu proses beynəlxalq arenada parçalanmanın daha da dərinləşməsinə səbəb ola bilər.
Bu barədə BMT-nin Baş katibi Antonio Quterreş BMT Baş Assambleyasının 81-ci sessiyasının ümumi siyasi müzakirələrində çıxışı zamanı bildirib.
Quterreş çoxqütblü dünya nizamının müxtəlif formalarda inkişaf edə biləcəyini vurğulayıb.
“Biz açıq şəkildə çoxqütblü dünyaya doğru irəliləyirik və bu proses geri dönməzdir. Lakin çoxqütblülük müxtəlif formalarda təzahür edə bilər. Mümkün variantlardan biri parçalanma və sövdələşməyə əsaslanan yanaşmanın üstünlük təşkil etdiyi dünyadır”, – deyə BMT rəhbəri bildirib.
Onun sözlərinə görə, belə bir dünya nizamında gərginlik və qarşılıqlı etimadsızlıq artacaq, bazarlar parçalanacaq, beynəlxalq institutlar zəifləyəcək və əməkdaşlıq imkanları məhdudlaşacaq.
Quterreş xəbərdarlıq edib ki, dövlətlərin münasibətlərində bir tərəfin qazancının digərinin itkisi hesabına əldə edildiyi yanaşmanın üstünlük təşkil etməsi beynəlxalq əməkdaşlığa mənfi təsir göstərə bilər.
BMT-nin Baş katibi həmçinin BMT-nin mərkəzi rol oynadığı çoxtərəfli beynəlxalq sistemin yaradılmasına çağırıb.
O bildirib ki, İkinci Dünya müharibəsindən sonra formalaşmış qlobal idarəetmə sistemi artıq müasir dünyadakı qüvvələr balansını əks etdirmir və islahatlara ehtiyac duyur.
