Yaponiya Mərkəzi Bankından mühüm qərar – Faiz artırıldı
Yaponiya Mərkəzi Bankı (BoJ) iki günlük pul siyasəti iclasından sonra uçot dərəcəsini 25 baza bəndi artırıb. Bununla da qısamüddətli faiz dərəcəsi 1 faizdən 1,25 faizə yüksəlib.
Qərar bankın İdarə Heyətində 2 səsə qarşı 7 səslə qəbul edilib. Faiz artımı Yaponiyanın uzun illər davam etdirdiyi aşağı faiz siyasətindən uzaqlaşması istiqamətində növbəti addım olub.
BoJ-un qərarında ölkədəki qiymət təzyiqləri və yapon yeninin dəyər itirməsi mühüm rol oynayıb.
Yaponiyada inflyasiyanın Mərkəzi Bankın 2 faizlik hədəfi ətrafında qalması, enerji xərclərinin və idxal qiymətlərinin artması pul siyasətinin sərtləşdirilməsinə təsir edən əsas amillər sırasında göstərilib.
Mərkəzi Bank şirkətlərin artan xərcləri qiymətlərə əks etdirməyə davam etdiyini, baza inflyasiya göstəricilərində isə yüksəliş risklərinin olduğunu bildirib.
Yaponiya uzun illər iqtisadi durğunluq və deflyasiya ilə mübarizə məqsədilə çox aşağı faiz siyasəti həyata keçirib. Son dövrdə əməkhaqlarının və qiymətlərin artması fonunda BoJ pul siyasətini tədricən sərtləşdirməyə başlayıb. Son faiz artımı da bankın faiz dərəcələrini normal səviyyələrə yaxınlaşdırmaq istiqamətində atdığı addımlardan biri kimi qiymətləndirilir.
Faiz artımı bazarlar tərəfindən böyük ölçüdə gözlənilsə də, qərardan sonra Nikkei 225 indeksi yüksəlib. Faiz artımına baxmayaraq, yenin dollar qarşısında hərəkəti məhdud qalıb. Analitiklər Yaponiya ilə ABŞ arasındakı faiz fərqinin valyutaya təsir göstərməyə davam edə biləcəyinə diqqət çəkiblər.
BoJ-un qarşıdakı dövrdə inflyasiyanın gedişi, iqtisadi artım və valyuta bazarındakı proseslərə uyğun olaraq yeni faiz qərarları qəbul edə biləcəyi bildirilir. Bazarlar Mərkəzi Bankın sədri Kazuo Uedanın növbəti dövrlə bağlı mesajlarını yaxından izləyir.
