İsraildə seçkiyə 39 gün qalmış yeni sorğu – Heç bir blok çoxluq əldə etmir
İsraildə oktyabrın 27-də keçirilməsi planlaşdırılan ümumi seçkilərlə bağlı son ictimai rəy sorğusunun nəticələri açıqlanıb. “Maariv” qəzetinin keçirdiyi sorğuya görə, Baş nazir Benyamin Netanyahunun rəhbərlik etdiyi koalisiya bloku hökumət qurmaq üçün tələb olunan çoxluğu əldə edə bilmir.
Sorğunun nəticələrinə əsasən, Netanyahu əleyhinə olan müxalifət partiyalarının 54, hazırkı hökumətdə təmsil olunan partiyaların isə 50 mandat qazana biləcəyi göstərilir. 120 yerlik Knessetdə hökumət qurmaq üçün 61 mandat tələb olunur və sorğuda heç bir əsas blok bu həddə çatmır.
İsrail vətəndaşı olan fələstinliləri təmsil edən partiyaların 12 mandat, iki əsas blokdan heç birinə daxil olmayan Ehtiyatda Olan Hərbçilər Partiyasının isə 4 mandat qazana biləcəyi proqnozlaşdırılır.
Sorğuda iştirakçılardan baş nazir postunda kimi görmək istədikləri də soruşulub. Nəticələrə görə, respondentlərin 48 faizi keçmiş Baş Qərargah rəisi Qadi Ayzenkotu, 40 faizi isə Benyamin Netanyahunu seçib.
