Merts Almaniya–ABŞ münasibətlərində ciddi dəyişiklik olduğunu bildirdi
Almaniya ilə ABŞ arasındakı münasibətlərdə ciddi dəyişikliklər baş verib. Bunu Almaniya kansleri Fridrix Merts Xristian Demokrat İttifaqının (CDU) Berlin bölməsinin seçkiqabağı tədbirində bildirib. DPA-nın məlumatına görə, kansler qeyd edib ki, qeyd-şərtsiz transatlantik tərəfdaşlıq dövrü, böyük ehtimalla, uzun müddətlik keçmişdə qalıb.
Merts bildirib ki, okeanın o tayında siyasi prioritetlər dəyişir və bu dəyişikliklər transatlantik ittifaqın əhəmiyyətinə yenidən baxılmasını da əhatə edir. Onun sözlərinə görə, belə bir vəziyyəti yaxın keçmişədək təsəvvür etmək çətin idi.
Bununla yanaşı, Almaniya hökumətinin başçısı yaranan imkanlardan istifadə etməyə çağırıb. Onun sözlərinə görə, Almaniya daha müstəqil olmalı və üzərinə daha çox məsuliyyət götürməlidir.
Mertsin ABŞ Prezidenti Donald Trampla münasibətləri kanslerin İran münaqişəsi ilə bağlı Vaşinqtonu tənqid etməsindən sonra gərginləşib. Gömrük məsələləri ətrafındakı mübahisələr də əlavə gərginlik yaradır.
Bu fonda kansler BMT Baş Assambleyasının yüksək səviyyəli həftəsi çərçivəsində keçiriləcək tədbirlərdə iştirak etmək üçün planlaşdırılan Nyu-York səfərini ləğv edib. Rəsmi səbəb kimi isə hökumət başçısının Berlində olmasının zəruriliyi göstərilib.
