Başınızı belə tutursunuzsa, qoşa çənə yarana bilər

Qoşa çənə çox vaxt başı aşağı əymək vərdişi səbəbindən yarana bilər. Bu barədə NEWS.ru-ya kosmetoloq və plastik cərrah Zühra Balakərimova bildirib.

Həkimin sözlərinə görə, uzun müddət başı önə əyilmiş vəziyyətdə saxlamaq boyun əzələlərinə təsir edir. Bu zaman ağırlıq mərkəzi dəyişir, boynun əsas əzələlərindən biri olan platizma zəifləyir və nəticədə yumşaq toxumalar dəstəyini itirərək çənə altında arzuolunmaz qat yarada bilər.

Balakərimova qeyd edib ki, başı neytral vəziyyətdə saxlamaq — yəni qulaqların çiyinlərlə eyni xəttdə olması — üzün aşağı hissəsinin konturunu yaxşılaşdıra bilər.

Mütəxəssis əlavə edib ki, artıq çəki də qoşa çənənin yaranmasına səbəb olan əsas amillərdən biridir. Çənəaltı nahiyədə yığılan piy toxuması adətən arıqlama zamanı ən gec azalan bölgələrdən sayılır.

Həkimin sözlərinə görə, qidalanmaya da diqqət etmək vacibdir. Duzun həddindən artıq qəbulu, maye ləngiməsi, yuxu çatışmazlığı və ödem üzün aşağı hissəsini daha ağır göstərə bilər.

Balakərimova bildirib ki, balanslı qidalanma, kifayət qədər su içmək, normal yuxu rejimi və üz-boyun əzələləri üçün düzgün seçilmiş məşqlər qoşa çənə görünüşünün azalmasına kömək edə bilər. Lakin bu məşqlər mütəmadi və həddindən artıq gərginlik yaratmadan edilməlidir.

DenMedia.az