Mətbəxdə gizli təhlükə: “sağlam” bambu qablar sizi zəhərləyə bilər

Evdə yemək bişirərkən təkcə məhsullara yox, istifadə etdiyiniz mətbəx ləvazimatlarının gigiyena və sağlamlıq baxımından təhlükəsizliyinə də ciddi diqqət yetirmək lazımdır. Çox vaxt yalnız görünüşünə və ya “təbii” olduğu iddiasına görə seçilən məhsullar əslində sağlamlığınıza ciddi zərər verə bilər.

Son araşdırmalar göstərir ki, xüsusilə bambu görünüşlü qablar düşündüyünüz qədər təhlükəsiz deyil. Bu məhsulların əksəriyyəti təmiz bambudan hazırlanmayıb, əksinə, kimyəvi maddələrlə zəngin kompozit materiallardan ibarətdir.

Əsas problem isə onların istehsalında istifadə olunan melamin-formaldehit qatranıdır. Bambu tozu və ya lifləri bu kimyəvi yapışdırıcı ilə birləşdirilərək qab formasına salınır.

Təhlükə istifadə zamanı başlayır:

70°C və daha yüksək temperaturda bu qablar qida ilə təmasda olduqda formaldehit və melamin maddələri yeməyə sızır. Yəni sağlam hesab etdiyiniz qab əslində kimyəvi risk mənbəyinə çevrilir.

Bu maddələrin təsiri isə ciddi ola bilər:

Melamin uzunmüddətli istifadədə böyrək daşı və böyrək çatışmazlığına səbəb ola bilər.

Formaldehit isə Ümumdünya Səhiyyə Təşkilatı tərəfindən kanserogen maddə kimi tanınır və tənəffüs, həzm sistemi problemləri yarada bilər.

Xüsusilə uşaqlar və körpələr bu risklərə qarşı daha həssasdır.

Mütəxəssislər xəbərdarlıq edir:

Əgər qabın səthi plastik kimi hamar və rənglidirsə və üzərində “bambu lifindən hazırlanıb” yazılıbsa, bu məhsulun kimyəvi tərkibli olma ehtimalı çox yüksəkdir.

Daha təhlükəsiz seçimlər:

İsti yeməklər üçün şüşə, porselen və ya paslanmayan polad qablar istifadə edin.

Bambu məhsullardan istifadə edəcəksinizsə, onları yalnız quru qidalar üçün istifadə edin.

Bu qabları mikrodalğada və ya qabyuyan maşında istifadə etməyin, çünki yüksək temperatur kimyəvi sızıntını artırır.

DenMedia.az