Ramazana necə hazırlaşmalı? Mədəni qorumağın qızıl qaydaları
saida
Ramazan ayına sayılı günlər qalmış qidalanma rejimində ediləcək kiçik, lakin təsirli dəyişikliklər oruc prosesinin daha rahat və sağlam keçməsinə kömək edir. Mütəxəssislər bu dövrün xüsusilə mədə həssaslığı olan şəxslər üçün hazırlıq mərhələsi kimi dəyərləndirilməli olduğunu bildirirlər.
Yemək saatlarının qəfil dəyişməsi və uzunmüddətli aclıq mədə turşusunun artmasına, nəticədə isə reflü və qastrit kimi problemlərə yol aça bilər. Cəmiyyətdə geniş yayılmış “Ramazan gəlməmiş hər şeyi yeyim” yanaşmasının isə mədəyə ən böyük zərəri verdiyi vurğulanır.
Orucdan əvvəlki həftə ərzində mədə həcmini tədricən kiçiltmək, şərbətli şirniyyatlar və qızartmalardan uzaq durmaq tövsiyə olunur. Bu keçid prosesi orqanizmin bioloji saatının Ramazan ayına daha rahat uyğunlaşmasını təmin edir.
Qastroenterologiya mütəxəssisləri bildirir ki, mərhələli keçid üsulu mədə sağlamlığının qorunmasında əsas rol oynayır:
“Ramazandan əvvəl mədəni dincəltmək, oruc zamanı yaranan reflü və qastrit şikayətlərini təxminən 50 faiz azalda bilər. Axşam yeməklərində yüngül şorbalar və zeytun yağlı tərəvəz yeməkləri üstünlük təşkil etməlidir. Gün ərzində kofein qəbulu azaldılmalı, əvəzində rezene və ya çobanyastığı çayı içilməlidir. Hazırlıqsız mədə ilk iftarda ən şiddətli ağrıları yaşadar.”
Mütəxəssislər həmçinin vurğulayırlar ki, suyu yalnız yemək zamanı içmək yanlışdır. Su öyünlər arasında, yudum-yudum qəbul edildikdə mədəni genişlətmədən orqanizmin su balansını qoruyur və aclıq müddətini daha rahat keçirməyə kömək edir.
