Uşaqlar niyə saatlarla onlayn oyunlardan çıxa bilmir?

Kompüter oyunlarının tərtibatçıları yeniyetmə istifadəçilərin diqqətini saxlamaq üçün daimi mükafatlar və nailiyyətlər sistemindən istifadə edirlər. Bu barədə NEWS.ru-ya açıqlamasında psixoloq Yelena Kalaşnikova bildirib. Onun sözlərinə görə, bu yanaşma əsas neyrobioloji mexanizmləri istismar edərək sonsuz inkişaf illüziyası yaradır.

Mütəxəssis qeyd edib ki, oyunlarda motivasiya formalaşması, zövq alma və uğur hissi məqsədli şəkildə hərəkətə gətirilir. Səviyyələrin keçilməsi, uğur anlarının paylanması, personaj və texnikanın təkmilləşdirilməsi istifadəçidə daimi irəliləyiş təəssüratı yaradır. Çox vaxt “dopamin möhkəmləndirmələri” adlandırılan bu mexanizm əslində tez-tez verilən, lakin kiçik mükafatlardır və böyük zehni və ya fiziki səy tələb etmir. Nəticədə artım demək olar ki, sonsuz görünür və insan nailiyyətçilik tələsinə düşür — dayanmaq çətinləşir.

Kalaşnikova əlavə edib ki, premium hesablar və oyun daxili valyutaya xərclənən pullar da cəlbediciliyi artırır: xərcləri psixoloji olaraq dəyərsizləşdirmək çətin olur. Bundan başqa, reytinqlər, klanlar və birgə missiyalar kimi sosial mexanizmlər beyində başqalarına qarşı məsuliyyət hissini gücləndirir.

“İnsan düşünür ki, artıq vaxt və pul xərcləmişəmsə, daha çoxuna çatmalıyam. Bu xərcləri haqq qazandırmaq üçün oyundan çıxmaq psixoloji baxımdan daha da çətinləşir. Sosial mexanizmlər isə sürətli zövqdən əlavə başqalarına qarşı öhdəlik hissi yaradır və prosesə bağlılığı artırır”, — deyə psixoloq yekunlaşdırıb.

DenMedia.az