Canlı yayımda nalayiq ifadələr işlədən daha bir tiktoker saxlanıldı

Tiktokda söyüş söyən daha bir nəfər saxlanılıb.

Denmedia.az lent.az-a istinadən xəbər verir ki, Sabirabad rayon sakini 34 yaşlı Əzəmət Bilalov (ad və soyad şərtidir) internet informasiya ehtiyatında cəmiyyətə açıqca hörmətsizlik ifadə edən hərəkətlərə yol verib.

Buna görə də o saxlanılıb və barəsində İnzibati Xətalar Məcəlləsinin 510.2-ci (İnternet informasiya ehtiyatında və ya informasiya-telekommunikasiya şəbəkəsində kütləvi nümayiş etdirildiyi halda ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlərin edilməsinə, yəni əxlaqsız ifadələrin səsləndirilməsinə və ya belə məzmun təəssüratı yaradan jestlərin edilməsinə, yaxud insan bədəninin hissələrinin əxlaq normalarına və milli-mənəvi dəyərlərə zidd formada göstərilməsinə görə) maddəsilə protokol tərtib olunub.

Ə. Bilalov bildirib ki, sosial şəbəkədə canlıya qoşulub və söhbət zamanı keçirdiyi gərginliyə görə nalayiq ifadələr işlədib. O, əməlindən peşman olduğunu deyib.

Məhkəmənin qərarı ilə Ə. Bilalov 500 manat məbləğində cərimələnib.