Görüşün gözlənilməz mövzusu: Lukaşenko ABŞ nümayəndəsi ilə artıq çəkidən danışıb
saida
Belarus Prezidenti Aleksandr Lukaşenko ABŞ Prezidenti Donald Trampın xüsusi nümayəndəsi Con Koul ilə danışıqlar zamanı arıqlama preparatları barədə maraqlanıb. Bu barədə Wall Street Journal (WSJ) yazır.
Nəşrin məlumatına görə, Con Koul Lukaşenkoya ABŞ-da piylənməyə qarşı istifadə olunan “Zepbound” preparatı ilə bağlı şəxsi təcrübəsindən danışıb və dərmanın istehsalçısına aid broşuranı Belarus liderinə təqdim edib.
Wall Street Journal qeyd edir ki, amerikalı rəsmi dairələr Lukaşenkonun artıq çəkidən qurtulmaq istədiyini nəzərə alaraq, onun üçün “Zepbound” preparatının şəxsi istifadə məqsədilə əldə olunması imkanlarını müzakirə ediblər.
“Bəlkə də ABŞ rəsmiləri düşündülər ki, artıq çəki ilə mübarizədə 71 yaşlı dövlət başçısına kömək etməyin bir yolu tapıla bilər”, — deyə qəzet yazır.
Məqalədə vurğulanır ki, Lukaşenko bu mövzu ilə ilk dəfə maraqlanmır. Belə ki, o, aprel ayında da çəki azaldan preparatlar haqqında suallar verib və ona yaxın məsləhətçilərdən biri “artıq çəkisi ilə bağlı nəsə etməyi” tövsiyə edib.
