Qapalı qapılar arxasında dəhşət: Almaniyada illər sonra üzə çıxan cinayət

Almaniyanın Axen şəhər məhkəməsi 61 yaşlı Fernando P.-ni 8 il 6 ay həbs cəzasına məhkum edib.

Denmedia.az BBC-ə istinadən xəbər verir ki, o, illər ərzində həyat yoldaşını sakitləşdirici dərmanlarla huşsuz hala salaraq zorlayıb, bu cinayətləri videoya çəkib və internetdə yayımlayıb.

Məhkəmə Fernando P.-ni ağırlaşdırıcı hallarda təcavüz, ağır bədən xəsarətləri yetirmə və şəxsi həyatın toxunulmazlığını pozma maddələri üzrə təqsirli bilib. Almaniya qanunlarına əsasən, qadının təhlükəsizliyi üçün onun tam adı açıqlanmayıb.

İstintaq materiallarına görə, İspaniya əsilli Fernando P. 2018–2024-cü illər ərzində həyat yoldaşına dəfələrlə sedativ dərmanlar verərək onu huşsuz vəziyyətə salıb və zorlayıb. Daha sonra bu görüntüləri qrup çatlarında və müxtəlif internet platformalarında paylaşıb.

“O, bu videoları digər istifadəçilərin baxa biləcəyi onlayn platformalara yükləyirdi,” — deyə məhkəmənin sözçüsü Katarina Effert bildirib.

Məhkəmə prosesinin böyük hissəsi qapalı rejimdə keçirilib. Qadının vəkili Nikole Servati bildirib ki, müvəkkili prosesdə mühüm rol oynayıb:

“O, ifadə verə bildi, hisslərini açıq şəkildə söylədi və uzun illər içində daşıdığı ağır yükdən danışdı.”