Putinlə Zelenskini gözləyən aqibət – 85 il öncəki olay təkrarlana bilər

“Ukrayna Prezidenti Volodimir Zelensiki sağlığında, Rusiya Prezidenti Vladimir Putin isə öləndən sonra elə öz xalqları tərəfindən lənətlənəcək”.

DenMedia.az  xəbər verir ki, bunu REAL partiyasının sədri Natiq Cəfərli deyib.

“Tarixdə elə hadisələr var ki, dərhal obyektiv qiymət vermək mümükün deyil. Mütləq zaman keçməlidir ki, baş verənləri dərk edəsən. Məsələn, 1939-40 ci illərdə SSRİ Stalinin qərarı ilə Finlandiyaya hücum etdi, qanlı müharibə başladı. Bu, 105 gün davam etdi, Finlandiya 67 minə yaxın insanını itirdi, SSRİ-nin itkiləri isə 95348 nəfər oldu.

Müharibə başlayandan 105 gün sonra Finlandiyanın o zamankı lideri Carl Gustaf Mannerheim torpaqlarının 10 faizini itirmək şərti ilə sülh müqaviləsi bağladı, neytral statusu qəbul etdi. İkinci Dünya müharibəsindən sonra Finlandiya neytral statusunu gözəl istifadə edərək dünyanın ən inkişaf etmiş ölkələrindən birinə, bir çox sahələrdə isə ən çox inkişaf etmiş ölkəsinə çevrildi. Bu fenomen dünya siyasi ədəbiyyatına “Finlandizasiya” termini ilə düşdü. Bu gün isə Finlandiya artıq həm də NATO-nun üzvüdür.

Tarix üçün 85 il andır, saniyədir, heç nədir. Amma o gün əslən isveç olan Mannerheimi “topa tutanlar”, onu satqın adlandıranlar var idi, buna baxmayaraq tarix onu haqlı çıxardı. Həm də ona görə ki, Finlandiyaya ayrılan yardımlar korrupsiyaya yem olmadı, demokratik sistem quruldu, xalq məsuliyyətini hiss edib çiçəklənən ölkə qurdu. Zelenski təbii ki, Mannerheim deyil”.

N.Cəfərli qeyd edib ki, Zelenskinin siyasi həyatı indi bitəcək və çox ağır dönəmdən keçəcək:

“Putin üçün eyni şeylər onun ölümündən sonra olacaq. Necə ki, hətta SSRİ-də, Dünya Müharibəsinin qalibi olan Stalin belə, ölümündən sonra siyasi anlamda “parça-parça” oldu. Bu gün Ukrayna xalqı çox ağır seçim qarsısındadır: yaxşı seçim heç yoxdur, pis və çox pis seçim var.

Ukrayna xalqı 4 ilə yaxındır ki, qəhrəmanlıq nümunəsi, oğru elitasına baxmayaraq müqavimət göstərir, amma resurslar bitir, tükənir. Kiyev üçün dünyanın bütün silahlarını, pullarını versən də vəziyyət dəyişmir, dəyişməyəcək. Çünki artıq yorulublar, könüllü vuruşmaq istəyənlərin sayı azalıb. Bu gün Ukrayna “Finlandizasiya” modelinə keçsə, bəlkə 10-15, bəlkə 20 ildən sonra Avropanın ən inkişaf etmiş ölkəsi, sonda NATO üzvü ola bilər. Hətta post-Putin dönəmində öz torpaq itkilərini də qaytara bilər. Başqa yol, təəssüf ki, görünmür”.(Globalinfo.az)