Rusiyanın Xalq Artisti Yuri Nikolayev dünyasını dəyişdi

Rusiyanın Xalq Artisti və məşhur televiziya aparıcısı Yuri Nikolayev vəfat etdi

DenMedia.az xəbər verir ki,  bu barədə məlumatı balet ustası Nikolay Tsiskariadze öz Telegram kanalında yayıb.

“Yuri Nikolayev göylərə yüksəldi... Bir neçə ay öncə biz “Bu axşam” verilişində onun peşə yubileyini birlikdə qeyd edirdik... İnsan, bu qədər ulduzu parlatmış insan... Və indi xəbər gəldi ki, o artıq yoxdur... Necə acıdır! Nur içində yatsın,” — yazıb Tsiskariadze.

Mash nəşrinin məlumatına görə, televiziya aparıcısı xərçəng xəstəliyinin təkrarlanması nəticəsində vəfat edib — ağciyərlərində yeni şişlər yaranmışdı.

Mənbənin bildirdiyinə görə, son aylarda Yuri Nikolayev xroniki tənəffüs problemlərindən əziyyət çəkirdi: onda güclü nəfəs darlığı, öskürək, halsızlıq və başgicəllənmə müşahidə olunurdu. İlin əvvəlində evdə yıxılaraq bud sümüyünü sındırması da onun vəziyyətini daha da ağırlaşdırmışdı.

Həkimlərin dəfələrlə xəbərdarlıq etməsinə baxmayaraq, Nikolayev gündə iki bağlamaya qədər siqaret çəkməyə davam edirdi. Xəstəlik sürətlə irəlilədi və onun orqanizmi mübarizəyə tab gətirmədi.