Erməniləri sevindirən, Rusiyanı qəzəbləndirən dəyişiklik: Dəhliz buna görə...

“Beynəlxalq Sülh və Rifah naminə Tramp Marşrutu” (TRIPP) layihəsi, əslində Cənubi Qafqazda kommunikasiya xəritəsini yenidən qurmaq potensialına malik olan strateji təşəbbüsdür. Ermənistanın bu layihəyə razılıq verməsi və ABŞ-la yanaşı “qarşılıqlı müəyyən edilmiş üçüncü tərəflərlə” əməkdaşlıq etməsi həm regional güc balansını dəyişə, həm də siyasi mesaj xarakteri daşıya bilər”.

Denmedia.az  xəbər verir ki, bu sözləri Globalinfo.az-a politoloq Züriyə Qarayeva deyib.

Politoloq bildirib ki, TRIPP faktiki olaraq Zəngəzur dəhlizinin başqa ad altında beynəlxalq formata salınmasıdır:

Üçüncü tərəflərin layihəyə cəlb olunması geosiyasi baxımdan mühüm məqamdır. Buraya Böyük Britaniya, Avropa İttifaqı ölkələri, Türkiyə və hətta Yaxın Şərqdə strateji maliyyə imkanlarına malik dövlətlər daxil ola bilər. Bu tərəflərin iştirakı iki funksiyanı yerinə yetirir:

-Maliyyə və texniki dəstək – layihənin icrası üçün beynəlxalq maliyyə institutlarının (Dünya Bankı, Asiya İnkişaf Bankı və s.) resurslarını səfərbər etmək.

-Geosiyasi təminat – Rusiya və İranın bu layihəyə qarşı göstərə biləcəyi təzyiqləri yumşaltmaq və ABŞ-ın bölgədəki mövqeyini gücləndirmək”.

Züriyə Qarayeva

Z.Qarayeva əlavə edib ki, layihənin ABŞ-ın qarantlığı altında həyata keçirilməsi Ermənistanın xarici siyasətində Qərbə meyli daha da artırır və Moskvanın təsir imkanlarını məhdudlaşdırır:

“Bu, həm də İran üçün yeni geosiyasi çağırış yaradır, çünki dəhliz Cənubi Qafqazda ABŞ-ın hərbi-siyasi təsirini artıracaq.

Azərbaycan baxımından isə TRIPP-in reallaşması Naxçıvana maneəsiz quru əlaqəsi məsələsinin beynəlxalq təminatla həll olunması deməkdir. Bu, həm logistik üstünlüklər, həm də siyasi baxımdan mühüm qələbədir. Lakin ABŞ-ın dəhlizdə idarəedici rolu gələcəkdə layihənin geosiyasi çəkisini Vaşinqtonun regional strategiyasına daha çox bağlayacaq”.