Qəbələdə leysan fəsad törətdi: Laza kəndinə gedən yol dağıldı

Son iki gün ərzində Qəbələ rayonunun Laza kəndinə yağan fasiləsiz leysan yağışları nəticəsində yaşayış məntəqəsinə gedən avtomobil yoluna ciddi ziyan dəyib. DenMedia.az azərtac-a istinadən xəbər verir ki, Dəmiraparan çayı boyunca keçən güclü sel səbəbindən yolun bir hissəsi tamamilə dağılıb. Təhlükəsizlik məqsədilə kəndə aparan əsas yol müvəqqəti olaraq nəqliyyatın hərəkəti üçün bağlanıb.

Qəbələ Suvarma Sistemləri İdarəsindən bildirilib ki, aidiyyəti qurumların mütəxəssisləri artıq əraziyə baxış keçiriblər. Hazırda təbii fəlakətin nəticələrinin operativ şəkildə aradan qaldırılması üçün zəruri tədbirlər görülür.

Qəbələ Rayon İcra Hakimiyyəti yanında Fövqəladə Hallar Komissiyasının məlumatına görə, kəndlə nəqliyyat əlaqəsi kəsilməyib. Sakinlərin və nəqliyyat vasitələrinin hərəkəti alternativ yolla təmin olunur.

Hazırda Dəmiraparan çayında daha böyük dağıntıların qarşısını almaq üçün məcranın tənzimlənməsi işləri aparılır. Eyni zamanda yolun zədələnmiş hissəsinə ağır texnika cəlb olunub və bərpa işləri davam etdirilir.

Mütəxəssislər vəziyyətin monitorinqini davam etdirirlər. Təbii fəlakətin nəticələrinin aradan qaldırılması gücləndirilmiş rejimdə həyata keçirilir.

DenMedia.az