Bu gün sanki mədəniyyətimizin bir parçası qopdu, bir qat dərisi soyuldu -FOTO

Böyük sənət adamları bəzən bu dünyanın ölçülərinə sığmır. Onlar yaşadıqları mühitdən daha geniş, daha dərin, daha ağrılı olurlar. Elə buna görə də gözlərində daim bir kədər, bir anlaşılmamaq yorğunluğu görünür. Sanki bu dünya onların ruhuna dar gəlir, nəfəs almağa imkan vermir.

Rasim Balayevin baxışlarında bu kədər vardı. Bu, hiss edənlərin, anlayanların, amma anlatmağa bəzən söz tapmayanların kədəri idi. Sənətini sadəcə yaratmırdı, onu yaşayırdı. Hər əsərində bir parça ömrünü qoyurdu, hər kəlməsində bir az da özünü itirirdi.

Böyük sənətkarlar əslində ölmür. Onlar bu dünyadan köçəndə sadəcə cismani varlıqları gedir, amma ruhları yaratdıqları ilə qalır. Lakin buna baxmayaraq, hər belə itki mədəniyyətin ruhunda dərin bir boşluq yaradır.

Bu gün sanki mədəniyyətimizin bir parçası qopdu, bir qat dərisi soyuldu. Çünki o, bir dövrün səsi, bir xalqın hisslərinin ifadəsi idi.Onun yoxluğu, onu tanıyan, hiss edən hər kəsi yetim qoydu. Çünki belə insanlar nadir doğulur və getdikdə yerini doldurmaq olmur.

Bəlkə də o, bu dünyaya həddindən artıq həssas gəldi. Bəlkə də buna görə bu qədər tez yoruldu. Amma geridə qoyduğu izlər sübut edir ki, o yaşadı — həm də çoxlarının yaşaya bilmədiyi qədər dərindən.

Allah rəhmət eləsin. Onun sənəti isə yaşayacaq...