Dərinizi gözəlləşdirmək əvəzinə korlayan 5 vərdiş
Dəriyə qulluq zamanı edilən bəzi geniş yayılmış səhvlər dərinin vəziyyətini yaxşılaşdırmaq əvəzinə ona zərər verə bilər. Dermatoloqlar Elizabet Bahar Huşmand və Coşua Zayxner bu vərdişlərdən uzaq durmağı tövsiyə ediblər.
“The Washington Post”un məlumatına görə, Huşmandın diqqət çəkdiyi əsas səhvlərdən biri “nə qədər çox məhsul, bir o qədər yaxşı nəticə” düşüncəsidir.
Dermatoloq bildirib ki, turşuların, retinoidlərin və C vitamini tərkibli serumların eyni vaxtda və həddindən artıq istifadəsi dəridə qıcıqlanma yarada bilər. Üzü çox tez-tez yumaq, skrablardan və pilinq vasitələrindən həddindən artıq istifadə etmək isə dərinin qoruyucu baryerini zədələyə bilər.
Digər səhv üzü çox isti su ilə yumaqdır. İsti su dərinin səthindəki təbii yağları azaldaraq quruluq və qıcıqlanmanı gücləndirə bilər. Dermatoloq ilıq sudan istifadə etməyi və duşdan dərhal sonra nəmləndirici krem çəkməyi məsləhət görür.
Zayxner isə makiyaj və günəşdən qoruyucu kremi təmizləmədən yatmamağı, həmçinin sızanaqları sıxmamağı tövsiyə edib.
Mütəxəssis üz yuduqdan sonra yaranan və bir çox insanın təmizlik əlaməti hesab etdiyi “dartılmış, həddindən artıq təmiz dəri” hissinin əslində yaxşı əlamət olmadığını vurğulayıb. Bu hiss dərinin həddindən artıq quruduğunu və qoruyucu baryerin zərər görə biləcəyini göstərə bilər.
