Sevgidə ideal yaş fərqi varmı? Ekspertdən maraqlı cavab
Münasibətlərdə yaş fərqinin uzunmüddətli uyğunluğa təsiri ola bilər. Psixoterapevt Eloiza Skinner “Metro”ya açıqlamasında tərəflər arasında 0–3 yaş fərqinin münasibətlər üçün daha əlverişli ola biləcəyini bildirib.
Mütəxəssisin sözlərinə görə, eyni və ya yaxın yaşda olan tərəfdaşların həyat planları, maliyyə məsələləri, sağlamlıq vəziyyəti və gündəlik vərdişlər baxımından bir-birinə uyğunlaşması daha asan ola bilər.
Yaş fərqi böyük olduqda isə bəzi məsələlərdə fikir ayrılığı yaranması ehtimalı artır. Buraya uşaqların dünyaya gəlməsi və tərbiyəsi, pensiyaya çıxma dövrü, maliyyə planlaşdırması, eləcə də dəyərlər və emosional yetkinlik səviyyəsindəki fərqlər daxil ola bilər.
Bununla belə, Skinner vurğulayıb ki, “ideal yaş fərqi” kimi universal bir qayda yoxdur və hansı həddən sonra yaş fərqinin problemə çevrildiyini dəqiq demək mümkün deyil.
Ekspert xüsusilə tərəflərdən birinin digərindən xeyli varlı və ya daha yüksək statuslu olduğu münasibətlərdə güc balansına diqqət yetirməyin vacib olduğunu qeyd edib. Eyni zamanda, böyük yaş fərqinə baxmayaraq, sağlam, xoşbəxt və uzunmüddətli münasibətlərin də tamamilə mümkün olduğunu bildirib.
