Sara Ferguson qalmaqaldan sonra geri qayıtmağa hazırlaşır - FOTO

Britaniya mediası şahzadə Endryunun keçmiş həyat yoldaşı Sara Fergusonun yenidən ictimai həyata qayıda biləcəyini yazır.

Daily Mail-in məlumatına görə, kral ailəsi üzrə şərhçi Fil Dampyer hesab edir ki, Ferguson ən ağır reputasiya böhranlarından sonra belə özünü yenidən qurmaq bacarığına malikdir.

Onun adı ilin əvvəlində Ceffri Epşteynlə uzunmüddətli yazışmalarının üzə çıxmasından sonra yenidən qalmaqala qarışıb. Sənədlərdə xeyriyyə və biznes layihələri ilə bağlı yazışmaların olduğu bildirilirdi. Bundan sonra bir neçə xeyriyyə təşkilatı onunla əməkdaşlığı dayandırıb, fondunun fəaliyyəti isə müvəqqəti olaraq dayandırılıb.

Qalmaqaldan sonra Ferguson uzun müddət ictimaiyyət qarşısına çıxmayıb. Britaniya mətbuatı onun Avstriyada yaşadığını və maliyyə çətinlikləri ilə üzləşdiyini də yazıb.

Fil Dampyerin fikrincə, Sara Ferguson Böyük Britaniyaya qayıdaraq öz mövqeyini açıqlaya, kral III Çarlzla münasibətlərini yaxşılaşdırmağa çalışa və yeni biznes və ya media layihəsinə başlaya bilər. Lakin bu iddialar hələlik rəsmi şəkildə təsdiqlənməyib.

Mənbə: Daily Mail