Rusiyada iflasların artımı zəiflədi
saida
Rusiyada vətəndaşların iflas prosedurlarının sayında artım tempi azalmağa davam edir.
Bu barədə “İnterfaks” Fedresursun məlumatlarına istinadən xəbər yayıb.
2026-cı ilin ikinci rübündə məhkəmədənkənar iflas prosedurlarının sayı ötən ilin eyni dövrü ilə müqayisədə 13,1% artaraq 17,9 minə çatıb. Birinci yarımilin yekunlarına görə isə göstərici 9,1% artıb və 34,3 min olub.
Müqayisə üçün qeyd olunur ki, bir il əvvəl artım ikinci rübdə 25%, birinci yarımildə isə 24,3% təşkil edirdi.
Məhkəmə qaydasında iflas prosedurlarında artım tempi daha nəzərəçarpacaq dərəcədə zəifləyib. İkinci rübdə məhkəmələr vətəndaşlar və fərdi sahibkarlarla bağlı 140,03 min prosedur tətbiq edib. Bu, ötən ilin eyni dövrü ilə müqayisədə cəmi 0,9% çoxdur.
Birinci yarımildə məhkəmə qaydasında iflasların sayı 6,8% artıb. Halbuki bir il əvvəl bu göstərici 36%-dən çox idi.
Ekspertlər bununla yanaşı, borcların restrukturizasiyasına marağın artdığını bildirirlər. 2026-cı ilin ilk altı ayında məhkəmələr tərəfindən təsdiqlənən restrukturizasiya planlarının sayı 2,4 dəfə artıb, onların ümumi prosedurlar içində payı isə 0,4%-dən 1%-ə yüksəlib.
Eyni zamanda məhkəmələrin vətəndaşları borclardan azad etməkdən imtina etdiyi hallar da artıb. Arbitraj idarəçilərinin hesabatlarına görə, birinci yarımildə belə qərarların sayı 2,9 dəfə çoxalıb, onların payı isə əvvəlki ilin 1,1% göstəricisi ilə müqayisədə 2,4%-ə çatıb.
