Səudiyyənin Yəmən hücumunun pərdəarxası: Hədəf bu obyekt idi
Səudiyyə Ərəbistanının rəhbərlik etdiyi qüvvələr Yəmənin paytaxtı Sana yaxınlığında husilərin nəzarətində olan neft obyektlərinə aviazərbələr endirib.
Yerli mənbələrin məlumatına görə, Sananın qərbindəki Əs-Sabaha ərazisində yerləşən neft anbarına bir neçə hava zərbəsi endirilib.
Hücumlar Səudiyyə Ərəbistanı ilə Yəməndəki “Ənsar Allah” hərəkatı – husilər arasında qarşıdurmanın yenidən kəskinləşdiyi bir vaxtda baş verib.
Husilərin hərbi nümayəndəsi Yəhya Səri bildirib ki, Səudiyyə Ərəbistanı son sutka ərzində onların nəzarətində olan Yəmən ərazilərinə 124 zərbə endirib. Bu rəqəm husilərin açıqlamasına əsaslanır.
Bundan əvvəl husilər Səudiyyə Ərəbistanının “Saudi Aramco” neft şirkətinə məxsus obyektlərə, eləcə də Ər-Riyaddakı Kral Xalid Beynəlxalq Hava Limanına hücumların məsuliyyətini üzərlərinə götürüblər.
Qarşılıqlı raket, dron və aviazərbələr Səudiyyə Ərəbistanı ilə husilər arasında 2022-ci ildə əldə olunan nisbi sakitlikdən sonra ən ciddi hərbi eskalasiyalardan birinə çevrilib.
