İllərlə zəncirdə saxlanıldığı deyilən uşaqla bağlı DİN hərəkətə keçdi

Azərbaycanda sosial şəbəkələrdə uşağa qarşı mümkün zorakılıqla bağlı yayılan məlumatlar əsasında araşdırma aparılır.

Denmedia.az qafqazinfo-ya istinadən xəbər verir ki, bu barədə Daxili İşlər Nazirliyinin Mətbuat Xidmətindən məlumat verilib.

Nazirliyin nümayəndəsi Cəsarət Qənbərlinin sözlərinə görə, azyaşlı polis əməkdaşları tərəfindən ilkin müayinədən keçirilməsi üçün tibb müəssisəsinə aparılıb. Müayinədən sonra uşağın müvəqqəti sığınacaqla təmin olunması nəzərdə tutulur.

Bundan başqa, uşağın anasının narkoloji və psixoloji vəziyyətinin qiymətləndirilməsi istiqamətində tədbirlər görülür. Araşdırmanın nəticələrinə əsasən, hadisəyə hüquqi qiymət veriləcək.

Qeyd edək ki, daha əvvəl sosial şəbəkələrdə uşağın narkotik asılılığından əziyyət çəkdiyi iddia olunan anası tərəfindən zorakılığa məruz qalması barədə məlumat yayılmışdı. İddialara görə, azyaşlı uzun illər zəncirlə bağlı saxlanılıb və məktəbə getməyib.