SON DƏQİQƏ: Göygöldə festival zamanı taxta konstruksiya uçdu – xəsarət alanlar var

Göygöl rayonunda keçirilən "Xan Yaylağı" festivalında xoşagəlməz hadisə baş verib.

Denmedia.az-a hadisə şahidlərinin verdiyi məlumata görə, festival ərazisində quraşdırılmış taxta konstruksiya qəfil uçaraq ərazidə olan insanların üzərinə aşıb.

Hadisə nəticəsində müxtəlif dərəcəli bədən xəsarətləri alan şəxslərin olduğu bildirilir.

Məlumata əsasən, hadisə yerinə dərhal təcili tibbi yardım briqadaları və aidiyyəti dövlət qurumlarının əməkdaşları cəlb olunub. Yaralılara ilkin tibbi yardım göstərilib, onların bir qisminin müalicə müəssisələrinə aparıldığı qeyd olunur.

Hadisənin başvermə səbəbləri və xəsarət alanların dəqiq sayı hələlik açıqlanmayıb.

Faktla bağlı araşdırmalara başlanılıb. Rəsmi qurumların hadisə ilə bağlı açıqlama verəcəyi gözlənilir.

Təhminə Hüseynova

Denmedia.az