Pentaqonda havada təhlükəli maddələr aşkarlandı, personal təxliyə edildi

Pentaqon binasında havada təhlükəli maddələrin aşkarlanması səbəbindən bir neçə mərtəbə və dəhliz təcili şəkildə bağlanıb, personalın bir hissəsi isə təxliyə edilib.

Bu barədə CNN telekanalı məlumat yayıb.

Qurumun nümayəndəsi Şon Parnell jurnalistlərə açıqlamasında bildirib ki, daxili avtomatik təhlükəsizlik sistemləri havanın keyfiyyəti ilə bağlı ciddi problem aşkar edib.

Hadisənin baş verdiyi qanadda dərhal standart təhlükəsizlik protokolu işə salınıb. Bu protokol əməkdaşlardan ciddi özünütəcrid rejiminə riayət etməyi tələb edir.

Təhlükənin aradan qaldırılması üçün hadisə yerinə Pentaqonun Qüvvələrin Mühafizəsi Agentliyinin mütəxəssisləri və Arlinqton dairəsinin yanğın-xilasetmə xidməti cəlb olunub.

Operativ məlumatlara görə, hökumət kompleksinin bir neçə əsas dəhlizində ikinci mərtəbədən beşinci mərtəbəyədək olan otaqlar sərt karantin rejimində bağlanıb.

CNN-in məlumatlı mənbələrinin bildirdiyinə görə, ictimai təhlükəsizlik polisi hazırda binanın içərisində qaz maskaları və tam kimyəvi qoruyucu geyimlə hərəkət etməyə məcburdur.

DenMedia.az