“Birinci mərhələ başa çatıb” – Vens İranla münaqişədən danışdı
ABŞ ilə İran arasındakı münaqişə yaxın aylarda yeni mərhələyə keçə bilər. Bunu ABŞ-nin vitse-prezidenti Cey Di Vens “New York Post”a müsahibəsində bildirib.
Onun sözlərinə görə, vəziyyətin dəyişməsi üçün cəmi bir neçə ay lazım olacaq.
Lakin Vens hadisələrin bundan sonra necə inkişaf edəcəyini dəqiq proqnozlaşdırmağın mümkün olmadığını qeyd edib. O, həmçinin mövcud münaqişəni ABŞ tərəfinin ayırdığı mərhələlər baxımından təsvir edib.
Vensin sözlərinə görə, birinci mərhələ artıq başa çatıb. Bu mərhələ İranın nüvə proqramının və Silahlı Qüvvələrinin məhv edilməsindən ibarət olub.
Vens bildirib ki, indi qarşıda növbəti vəzifə dayanır. Bu isə İranın yenidən gücünü bərpa etməsinə imkan verməməkdir.
Vaşinqtonla Tehran arasındakı münasibətlərdə ayrıca məsələlərdən biri də İranın nüvə proqramıdır. Vens əlavə edib ki, bu məsələ ikitərəfli münaqişədə əsas mövzulardan biri olaraq qalır. ABŞ İrandan uranın zənginləşdirilməsini dayandırmağı tələb edir.
