Tramp Putinə Azərbaycan haqda nə deyib? – Kremli dəhlizlə bağlı sevindirən gəlişmə

Rusiyanın beynəlxalq təcrid altında olduğu, xüsusilə Cənubi Qafqazdan təzyiqlərlə sıxışdırıldığı bir dönəmdə ABŞ Prezidenti Donald Trampın bu ölkənin rəhbəri Vladimir Putinlə Alyaskada görüşü xüsusi diqqət çəkir. Həmçinin Ağ Ev rəhbəri ilə danışıqların Kreml liderinin mövqelərini möhkəmləndirəcəyi də deyilir.

Analitiklərin fikrincə, Putin siyasi və strateji baxımdan güclənərsə, bu, regiondakı balansı dəyişə və Azərbaycana müəyyən təhlükələr yarada bilər. Bakı-Moskva münasibətlərində mövcud gərginlik fonunda belə bir situasiya arzuolunmaz hesab edilir.

Denmedia.az xəbər verir ki, bu sözləri Globalinfoya-a danışan siyasi şərhçi Füzuli Qurbanov deyib ki, indiki şəraitdə dünyanın böyük dövlətlərinin liderlərinin görüşü xeyli sual doğurur:

“Dünyanın hər nöqtəsində baş tutan görüşlər bir çox müşahidəçilər və analitiklər tərəfindən fərqli kontekstdə izah edilir. Tramp və Putinin Alyaskadakı görüşü ilə Cənubi Qafqazdakı geosiyasi vəziyyət arasında müəyyən əlaqələr mövcuddur. Lakin hər şeyi bir görüşə bağlayıb qiymətləndirmək mövcud reallığı tam əks etdirməz.

Zəngəzur dəhlizi yalnız Avropa, ABŞ və Çinin deyil, həm də Rusiyanın maraq dairəsinə daxildir. Moskva dəhlizin açılmasında iştirak etməklə kommunikasiyalarda və ticarətdə əhəmiyyətli gəlir əldə edə bilər. Kreml Vaşinqtonda imzalanan üçtərəfli bəyannaməyə də müsbət münasibət bildirib. Rusiya baş nazirinin müavininin Ermənistan və Azərbaycana gözlənilən səfərləri göstərir ki, Kremli maraqlandıran məsələlər mövcuddur və bəzi suallara cavab tapmağa çalışacaq.

Alyaskada liderlərin nə danışdığı və Cənubi Qafqazla bağlı hansı mövzuların müzakirə edildiyi barədə dəqiq məlumat yoxdur. Lakin hər iki tərəf üçün bu məsələ olduqca həssasdır. Ukrayna ilə bağlı danışıqlarda ciddi nəticə əldə olunmasa da, prosesin davam etdirilməsi ilə bağlı razılığa gəlmək müəyyən ümidverici fikirlərin səslənməsinə səbəb olub. Bütün bunlar potensial olaraq hələ hər şeyin itirilmədiyini göstərir”.

Füzuli Qurbanov

Siyasi şərhçi bildirib ki, Zəngəzur dəhlizi məsələsində ABŞ və Rusiya arasında ciddi fikir ayrılıqlarının olduğunu düşünmür:

“Moskvanın prosesdə iştirakı gec-tez razılaşdırılacaq. Rusiyanın Cənubi Qafqazdan sıxışdırılması məsələsində isə ehtiyatlı olmaq lazımdır. Böyük dövlətlər geosiyasi nüfuzlarını bərpa etmək üçün mübarizələrini davam etdirirlər. İndiki reallıqlar fonunda ABŞ və Rusiyanın Cənubi Qafqazdakı proseslərə marağının artdığı görünür. Bölgədə geosiyasi həssaslıq yüksək səviyyədədir. İran da prosesdə aktiv iştirak edir. Ermənistanla təmasları və verdiyi bəyanatlar buna nümunədir.

Bütün bu proseslər Azərbaycanın İkinci Qarabağ müharibəsi və antiterror əməliyyatlarında əldə etdiyi uğurlar, formalaşan geosiyasi reallıqlar fonunda baş verir. Region və dünyanın böyük dövlətləri bu reallıqları qəbul edir və onların çərçivəsində kompromis variantları axtarmağa çalışırlar. Proseslər bu istiqamətdə davam edərsə, Çindən Avropaya qədər bir çox ölkənin və xalqların rifahı, sabit və təhlükəsiz yaşaması üçün gözəl imkan yaranacaq”.