2 min illik üzükdə İsa Məsihi ölümə məhkum edən şəxsin adı tapıldı
Arxeoloqlar Qüdsdən təxminən 13 kilometr cənub-şərqdə yerləşən qədim Herodium qalasında Ponti Pilatın adı həkk olunmuş təxminən 2 min illik mis ərintili üzüyü yenidən araşdırıblar.
“Popular Mechanics”in məlumatına görə, üzüyün üzərində yunan hərfləri ilə “Pilato” yazısı yer alıb. Ponti Pilat eramızın I əsrində Yəhudeyanın Roma prefekti olub və xristian mənbələrində İsa Məsihin çarmıxa çəkilməsi qərarı ilə əlaqələndirilir.
Tapıntının özü yeni deyil: üzük 1968–1969-cu illərdə Herodiumda aparılan qazıntılar zamanı aşkarlanıb, lakin uzun müddət onun üzərindəki yazı tam oxunmayıb. Sonrakı təmizləmə və müasir görüntüləmə üsulları yazının daha aydın müəyyənləşdirilməsinə imkan verib.
Alimlərin diqqətini çəkən əsas məqam üzüyün olduqca sadə və keyfiyyətsiz hazırlanmasıdır. Buna görə də tədqiqatçılar onun Ponti Pilatın özünə məxsus olmasını az ehtimal edirlər.
Yeni araşdırmaya əsasən, “Pilato” yazısı latın dilindəki ad formasının yunan hərfləri ilə transliterasiyası ola bilər və “Pilat üçün” və ya “Pilata məxsus” mənasını verə bilər. Tədqiqatçılar ehtimal edirlər ki, üzük Pilatın idarəçiliyində çalışan aşağı vəzifəli əməkdaşlardan biri tərəfindən istifadə olunub.
Belə möhürlü üzük sənədləri, qabları, qutuları və inzibati materialları işarələmək və ya möhürləmək üçün istifadə edilmiş ola bilər. Bununla belə, üzüyün Ponti Pilatla əlaqəsi barədə elmi müzakirələr hələ də davam edir.
