İran ABŞ-la razılaşma üçün əsas tələbi açıqladı

İran ABŞ-la qarşılıqlı anlaşma memorandumu imzalandıqdan dərhal sonra xaricdə dondurulmuş aktivlərinin yarısının ona qaytarılmasını tələb edir.

Bunu İran xarici işlər nazirinin müavini Kazem Qaribabadi bildirib.

Onun sözlərinə görə, İran vəsaitlərinin blokdan çıxarılması Tehran və Vaşinqton arasında mümkün razılaşmaların əsas məsələlərindən biri olaraq qalır.

Qaribabadi qeyd edib ki, aktivlərin mərhələli şəkildə qaytarılması sxemi müzakirə olunur. Lakin İranın minimum tələbi saziş imzalandıqdan dərhal sonra vəsaitlərin ən azı 50 faizinin qaytarılmasıdır.

“Bu, İranın pullarıdır. ABŞ həmin vəsaitləri qanunsuz şəkildə dondurub və digər ölkələrin onlardan istifadə etməsinə və ya İslam Respublikasına ötürməsinə imkan vermir”, deyə Qaribabadi Mehr agentliyinə müsahibəsində bildirib.

O əlavə edib ki, söhbət Qərb ölkələrinin maliyyələşdirməsindən deyil, yalnız Tehranın iddiasına görə, qanunsuz bloklanmış İran vəsaitlərinin qaytarılmasından gedir.

DenMedia.az