Sumqayıtda torpaq sahələrinin sənədləşdirilməsi sürətləndirildi – sakinlərdən dəstək istənilir-FOTOLAR

Azərbaycan Respublikasında torpaq münasibətlərinin tənzimlənməsi sahəsində əlavə tədbirlər haqqında Prezident İlham Əliyevin 7 mart 2016-cı il tarixli 818 nömrəli Fərmanının icrası çərçivəsində Sumqayıt şəhərində torpaq sahələrinin hüquqi sənədləşdirilməsi və koordinatların dəqiqləşdirilməsi istiqamətində işlər aparılır.

Sumqayıt Bələdiyyəsdən DenMedia.az-a bildirib ki, proses Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinin əməkdaşları ilə birgə həyata keçirilir. Hazırda Novxanı bağları, Saray bağları və Corat bağları ərazilərində yerində ölçmə işləri görülür.

Məlumata görə, əsas məqsəd torpaq sahələrinin dəqiq koordinatlarının müəyyənləşdirilməsi və sənədləşdirmə prosesinin sürətləndirilməsidir.

“Biz ölçmə işlərinin aparılması üçün şərait yaratmışıq. İstəyimiz odur ki, sakinlər də əməkdaşlıq etsinlər, qapılarını açsınlar ki, ölçmə prosesi rahat həyata keçirilsin və sənədləri tezliklə əldə etmək mümkün olsun.”-deyə Sumqayıt Bələdiyyəsdən bildirilib.

Rəsmi qurumlar sakinlərə müraciət edərək əməkdaşlara şərait yaratmalarını və işlərə dəstək göstərmələrini xahiş ediblər.