Sumqayıtda 7 ölkədən gələn xarici könüllülərin iştirakı ilə "Beynəlxalq Gənclər Günü" belə qeyd edildi-VİDEO

Sumqayıtda Beynəlxalq Gənclər Günü münasibətilə möhtəşəm tədbir təşkil olunub.

Denmedia.az xəbər verir ki,tədbirdə Sumqayıt Bələdiyyəsinin sədri Adil Xudadatov, “Sağlam Düşüncə” Gənclər Təşkilatının sədri Səadət Təhməzzadə, eləcə də Danimarka, Rumıniya, Türkiyə, Polşa, İtaliya, İspaniya və Qazaxıstandan gələn tələbə gənclər iştirak ediblər.

Tədbirdə çıxış edən Bələdiyyə sədri iştirakçılara Sumqayıt şəhər İcra Hakimiyyətinin başçısı Zakir Fərəcovun salamlarını çatdırıb və Beynəlxalq Gənclər Günü münasibətilə təbriklərini ifadə edib. O, Sumqayıtda həyata keçirilən sosial və infrastruktur layihələri barədə ətraflı məlumat verərək, xüsusilə gənclərin inkişafına yönəlmiş təşəbbüslərin daim dəstəkləndiyini vurğulayıb. Qeyd olunub ki, "Şəhər rəhbərliyi gənclərin potensialının reallaşması üçün hər zaman şərait yaradır və onların təşəbbüslərini dəyərləndirir".

“Sağlam Düşüncə” Gənclər Təşkilatının sədri Səadət Təhməzzadə isə göstərilən qonaqpərvərliyə görə təşəkkür edib. O bildirib ki, bu gün ölkəmizdə gənclərə xüsusi önəm verilir.

Xarici könüllülər də öz çıxışlarında Sumqayıtda gördükləri isti münasibətdən və onlara yaradılan şəraitdən məmnun olduqlarını ifadə ediblər.

Sonda iştirakçılara hədiyyələr təqdim edilib.