Hollivud cütlüyü niyə gizli evləndi? - FOTO
saida
Hollivud ulduzları Zendaya və Tom Holland şəxsi həyatlarını qorumaq üçün gizli şəkildə evlənmək qərarına gəliblər.
Bu barədə RadarOnline nəşri mənbəyə istinadən məlumat yayıb.
Mənbənin sözlərinə görə, cütlük üçün evlilik böyük media hadisəsi yaratmaqdan çox, onlar üçün vacib olan insanlara verilən bir vəd kimi qəbul olunub.
“Onlar artıq öz təcrübələrində görüblər ki, şəxsi hadisələr nə qədər tez ictimaiyyətin müzakirəsinə çevrilə bilər. Nəzarəti itirmək hissi onlara dəfələrlə təzyiq göstərib. Buna görə də bu dəfə bu anı qorumaqda qətiyyətli idilər. Bu, dramatik gizlilik üçün yox, müqəddəs saydıqları bir şeyi qorumaq üçün idi”, — deyə mənbə bildirib.
Mənbənin sözlərinə görə, məşhurlar özlərini ən rahat itləri ilə gəzərkən, evdə yemək bişirərkən və ya ailə ilə şam edərkən hiss edirlər.
“Məhz bu sakit və ailəvi həyat onlar üçün ən dəyərlisidir və toyları da bunu tam şəkildə əks etdirib”, — deyə mənbə əlavə edib.
Bir neçə həftə əvvəl Zendaya Los Angelesdə gəzinti zamanı üzük barmağında yeni qızıl üzüklə görüntülənmiş və bu da onun artıq Tom Hollandla evləndiyi ilə bağlı şayiələri gücləndirmişdi. Lakin cütlük bu barədə hələ rəsmi açıqlama verməyib.
Xatırladaq ki, 7 yanvar 2025-ci ildə Zendayanın Tom Hollandla nişanlandığı məlum olmuşdu. TMZ nəşrinin məlumatına görə, nişan katolik Miladı ilə Yeni il arasında baş tutub. Bildirilir ki, aktyor xüsusi şou təşkil etməyib və romantik an aktrisanın evində baş verib.
