3 böyük xəstəxana yenidən qurulur

“Tibb müəssisələrinin infrastruktur təminatının yaxşılaşdırılması məqsədilə ölkə üzrə bir sıra əsaslı təmir-tikinti layihələri həyata keçirilir və planlaşdırılır”.

Denmedia.az xəbər verir ki, bunu TƏBİB-in icraçı direktoru Vüqar Qurbanov “TƏBİB-in 2025-ci ilin yekunlarına və gələcək planlara dair” brifinqdə deyib.

V. Qurbanov qeyd edib ki, sözügedən fəaliyyət çərçivəsində istismara yararsız vəziyyətdə olan binaların yenidən qurulması, modul tipli tibb məntəqələrinin quraşdırılması, mühəndis-kommunikasiya sistemlərinin yenilənməsi üçün zəruri işlər görülür:

“Hazırda Nərimanov Tibb Mərkəzinin, Kliniki Tibbi Mərkəzin, Respublika Klinik Xəstəxanasının əsaslı yenidən qurulması işləri davam edir.Laçın Rayon Mərkəzi Xəstəxanasının müvəqqəti yerləşdirilməsi məqsədilə Laçın şəhərində yerləşən mövcud binanın əsaslı təmiri başa çatıb və istifadəyə verilib.Bakı şəhərində yerləşən 50 tibb müəssisəsində rentgen və flüoqrafiya otaqlarında, həkim idarəetmə və köməkçi otaqlarda bioloji müdafiə sistemlərinin yaradılması məqsədilə əsaslı təmir işləri həyata keçirilir”.

İcraçı direktor bildirib ki, Azərbaycanda ilkin tibbi-sanitariya yardımının gücləndirilməsi istiqamətində Bərdə rayonu ərazisində kənd həkim və tibb məntəqələrinin modul tipli avadanlıq, inventar daxil olmaqla quraşdırılması işləri icra olunur.

O, eyni zamanda qeyd edib ki, 28 saylı Şəhər Poliklinikasının əsaslı təmiri, eləcə də 132 tibb müəssisəsində rentgen və flüoqrafiya, həkim idarəetmə və köməkçi otaqlarda bioloji müdafiə sistemlərinin yaradılması məqsədilə əsaslı təmir işlərinin aparılması planlaşdırılır:

“Qubadlı rayonu ərazisində sendviç panel konteyner - modul tipli xəstəxananın quraşdırılması da planlaşdırılan layihələrdəndir. Eləcə də Sumqayıt şəhərində yerləşən 2 nömrəli Ailə Sağlamlıq Mərkəzinin, eləcə də Sumqayıt şəhər Təcili Tibbi Yardım Xəstəxanasının əsaslı təmiri və yenidən qurulması icra olunacaq əsas layihələr sırasındadır”.

V. Qurbanov həmçinin bildirib ki, yeni hemodializ şöbələri yaradılacaq:

“Xroniki böyrək çatışmazlığı üzrə tədbirlər çərçivəsində 4 337 nəfər xəstə qeydiyyata alınıb. Hemodializ xidməti üzrə mövcud vəziyyətə gəldikdə, hazırda respublika üzrə və TƏBİB tabeliyində hemodializ xidmətinin göstərildiyi tibb müəssisələrinin sayı 43, hemodializ şöbələrinin sayı 46, hemodializ aparatlarının sayı isə 675-dir. Cari il ərzində icra olunmuş hemodializ seanslarının ümumi sayı 503 892 təşkil edib”.

O qeyd edib ki, cari il ərzində proqram üzrə müxtəlif adda dərman vasitələri, tibbi ləvazimatlar, hemodializ məsrəfləri və hemodializ aparatları təmin edilərək hemodializ mərkəzlərinə paylanıb: “2025-ci ildə Sumqayıt Tibb Mərkəzinin 2 nömrəli xəstəxanasında xəstələr üçün dializ xidmətlərinə əlçatanlığı artırmaq məqsədilə yeni dializ şöbəsi açılmış, müvafiq dərman və tibbi ləvazimatlar, eləcə də avadanlıqlarla təmin edilib. Beləliklə, Sumqayıt Tibb Mərkəzində dializ şöbələrinin sayı ikiyə çatdırılıb. Gələn il ölkədə daha bir neçə xəstəxanada hemodializ şöbəsinin fəaliyyətə başlaması nəzərdə tutulur”.

İcraçı direktor əlavə edib ki, hazırda Bakı şəhərindəki tibb müəssisələrində, eləcə də Göyçay, Ucar və Gədəbəy rayon mərkəzi xəstəxanalarında müvafiq işlər davam etdirilir: “2025-ci ildə ilk dəfə olaraq proqram çərçivəsində qeydiyyatda olan 6 vətəndaş avtomatlaşdırılmış peritoneal dializə (APD) cəlb edilib. Əlavə olaraq, Xroniki Böyrək Çatışmazlığı üzrə Dövlət Proqramının icrası məqsədilə ölkə üzrə fəaliyyət göstərən hemodializ mərkəzlərinin maddi-texniki bazasının gücləndirilməsi davam etdirilib. Bu istiqamətdə aparılan təminat işləri çərçivəsində ümumilikdə 120 ədəd hemodializ aparatı tibb müəssisələrində quraşdırılıb və fəaliyyətinin təmin edilməsi məqsədilə texniki dəstək göstərilib. Verilən avadanlıqlar xəstələrin hemodializ xidmətinə fasiləsiz çıxışının təmin edilməsi, müasir standartlara uyğun dializ müalicəsinin təşkili və xidmət keyfiyyətinin yüksəldilməsi baxımından mühüm əhəmiyyət daşıyır”.