Diabetlə bağlı ən böyük yanlış fikir: bunlardan tam imtina etməyin
Bəzi insanlar “şəkərli diabet” diaqnozunu qadağalar siyahısı kimi qəbul edirlər. Onlar bundan sonra şirniyyat yeməyin mümkün olmadığını, idmanın isə təhlükəli olduğunu düşünürlər. Əslində diabet sağlamlığa diqqət tələb etsə də, adi həyat tərzindən tamamilə imtina etmək demək deyil.
Bu barədə endokrinoloq Vitaliy Andronov RT-yə müsahibəsində danışıb.
Həkimin sözlərinə görə, diaqnoz qoyulduqdan sonra ən çox edilən səhvlərdən biri tərkibində şəkər olan bütün məhsullardan tamamilə imtina etməyə çalışmaqdır.
“Qida qəbulunun yarısını müxtəlif rəngli tərəvəzlər təşkil etməlidir. Dörddəbir hissəsi zülallara – balıq, quş əti, yumurta, paxlalılar və qoz-fındığa ayrılmalıdır. Digər dörddəbir hissəni isə mürəkkəb karbohidratlar və tam taxıllı məhsullar – yulaf, qarabaşaq və kinoa təşkil etməlidir”, – deyə o bildirib.
Həkimin sözlərinə görə, şirniyyatı ömürlük qida rasionundan çıxarmaq mütləq deyil. Burada qəbul edilən karbohidratların miqdarını və ümumi qidalanma strukturunu nəzərə almaq vacibdir.
Andronov qeyd edib ki, tam bir qida qəbulundan sonra kiçik desert yemək, acqarına şirniyyat qəbul etməkdən daha məqsədəuyğun seçim ola bilər.
Bununla yanaşı, yalnız konkret məhsulun tərkibinə deyil, orqanizmin həmin qidaya fərdi reaksiyasına da diqqət yetirmək tövsiyə olunur.
