Demensiyadan qorunmaq üçün?... - FOTO
saida
Müxtəlif və balanslı qidalanma demensiyanın inkişaf riskini azaltmağa kömək edə bilər.
Bu barədə NEWS.ru-ya açıqlamasında Piroqov Universitetinin ambulator geriatriya şöbəsinin müdiri, həkim-geriatr və terapevt Andrey İzyumov bildirib.
Onun sözlərinə görə, beyin sağlamlığı üçün qidalanmada müxtəliflik və balans əsas rol oynayır. Həkim qeyd edib ki, heç bir məhsul təkbaşına bütün problemləri həll etmir.
İzyumov bildirib ki, elmi ədəbiyyatda koqnitiv funksiyalar üçün faydalı hesab edilən bir neçə qidalanma modeli təsvir olunur. Bunlara Aralıq dənizi pəhrizi, yüksək təzyiqin idarə olunmasına yönələn DASH pəhrizi, həmçinin neyrodegenerativ prosesləri yavaşlatmağa yönəlmiş MIND proqramı daxildir.
Mütəxəssisin sözlərinə görə, MIND pəhrizi göyərti, giləmeyvə, qoz-fındıq, zeytun yağı, tam taxıllar, balıq, paxlalılar və quş əti kimi faydalı məhsulları tövsiyə edir. Eyni zamanda qırmızı ət, kərə yağı, pendir, şirniyyat və qızardılmış qidaların məhdudlaşdırılması məsləhət görülür.
Həkim vurğulayıb ki, orqanizm üçün yalnız omeqa-3 yağ turşuları və antioksidantlar deyil, həm də B qrupu vitaminləri vacibdir. Xüsusilə B6, B9 və B12 vitaminləri tam taxıllarda, qaraciyərdə və yumurtada olur.
İzyumov əlavə edib ki, balıqdan alınan D vitamini, sitrus meyvələri və itburnuda olan C vitamini də mühüm rol oynayır.
Bununla belə, mütəxəssis vitaminlərdən nəzarətsiz istifadənin düzgün olmadığını bildirib. Onun sözlərinə görə, çox miqdarda vitamin qəbul etmək insanı “daha ağıllı” etmir, əksinə, sağlamlığa zərər verə bilər.
Həkim qeyd edib ki, yaş artdıqca insanda müxtəlif xəstəliklər yarana bilər və qidalanma yalnız beyin fəaliyyəti deyil, ümumi sağlamlıq nəzərə alınaraq qurulmalıdır. Məsələn, anemiya və dəmir çatışmazlığı olan şəxslər üçün qırmızı ət faydalı ola bilər.
İzyumovun sözlərinə görə, əsas prinsip hər şeyi ölçülü yemək, qidalanmada müxtəlifliyi qorumaq və vitamin-mineral çatışmazlığına yol verməməkdir.
