Simptom qorxusu ipoxondriyanı necə gücləndirir?
saida
İpoxondriyanın (xalq arasında "xəstəlik xəstəliyi" kimi tanınır, ciddi bir xəstəliyin olmamasına baxmayaraq, insanın özündə ağır və ya ölümcül bir xəstəliyin olduğuna inanması və bu barədə həddindən artıq narahatlıq keçirməsi ilə xarakterizə olunan psixi vəziyyətdir) müalicəsi üçün simptomlardan qorxmağı dayandırmaq lazımdır. Bunu “MK v Lenoblasti” nəşrinə psixoloq Natalya Juçkova deyib. Onun sözlərinə görə, insan hansısa simptomdan nə qədər çox qorxursa, onu bir o qədər tez-tez özündə tapır.
Mütəxəssis vurğulayıb ki, qorxu gərginlik yaradır, bu gərginlik isə bədəndə real hisslərə səbəb olur və həmin hisslər qorxunu daha da gücləndirir. Juçkova əvvəlcə tam tibbi müayinədən keçməyi və real xəstəliyin olmadığını dəqiqləşdirməyi tövsiyə edib.
Psixoloq qeyd edib ki, əgər qorxu həftələrlə keçmirsə, işləməyə və yatmağa mane olursa, psixoloqla işləmək zəruri ola bilər. Onun sözlərinə görə, belə vəziyyətdə insanın daim öz bədəni ətrafında düşünməkdən çıxması və öz bədənindən kənar dünyada dayaq nöqtəsi tapması vacibdir.
