Trampın “xərçəng resepti” təhlükəli çıxdı

Onkoloq həkim Endi Qaya və ümumi praktika həkimi Toni Banerci ABŞ-ın sabiq prezidenti Donald Trampın xərçənglə bağlı səsləndirdiyi fikirlərə qarşı xəbərdarlıq ediblər. Onlar bu barədə Daily Mirror nəşrinə açıqlama veriblər.

Müzakirələrə səbəb Trampın qazlı içkilərin guya xərçəng hüceyrələrini məhv edə bilməsi ilə bağlı səsləndirdiyi iddia olub. Həkimlərin sözlərinə görə, bu cür fikirlərin elmi əsası yoxdur və insanları yanlış yönləndirə bilər.

Onkoloq bildirib ki, şirin və ya turş mühit laboratoriya şəraitində hüceyrələrə təsir göstərə bilər, lakin bu, həmin təsirin insan orqanizmində də eyni şəkildə baş verəcəyi anlamına gəlmir. Əksinə, belə təsirlər sağlam hüceyrələrə də zərər verə bilər.

Həkimlər vurğulayıblar ki, insan bədənində turşuluq səviyyəsi ciddi şəkildə tənzimlənir və qazlı içkilərin qəbulu onkoloji xəstəliklərin yaranmasına və ya müalicəsinə birbaşa təsir göstərmir.

Toni Banerci isə qeyd edib ki, bu tip açıqlamalar dezinformasiya problemini daha da gücləndirir, xüsusilə də belə fikirlər ictimai fiqurlar tərəfindən səsləndirildikdə. Onun sözlərinə görə, bu cür bəyanatlar bəzən zarafat kimi səslənsə də, insanlar onları ciddi qəbul edə və təhlükəli nəticələrlə üzləşə bilərlər.

DenMedia.az