Fransız qadınları niyə kökəlmir? - FOTO

Fransız qadınlarının fenomeni bütün dünyanı valeh edir. Bir çoxları onların pendir, kruassan kimi qidalardan imtina etmədən necə incə qaldığını anlamağa çalışır. Vogue yazır ki, bunun sirri pəhrizlərdə və ya sərt məhdudiyyətlərdə deyil, qidaya münasibətdədir — yemək onlar üçün stress deyil, zövqdür.

Fransız qadınları heç vaxt tələsik yemir. Onların həyatında təsadüfi qəlyanaltılar və ya yeməklər arasında plansız snəklər yoxdur. Uşaqlıqdan formalaşan qaydaya görə gündəlik ritm aydındır: səhər yeməyi, nahar və şam yeməyi. Bu sabitlik orqanizmin balanslı işləməsinə kömək edir, artıq yeməyin qarşısını alır.

Onlar üçün nahar sadəcə yemək deyil. Parisdə nahar bəzən 2 saat davam edir. Bu vaxt yeməyin dadını hiss etmək, dayanmaq və ünsiyyət qurmaq üçündür. Yavaş yemək sayəsində toxluq siqnalı vaxtında gəlir və artıq yemək istəyi yaranmır.

Fransız qadınları dietik əvəzedicilərə üstünlük vermir. Onlar keyfiyyətli məhsullar seçir, yağlardan çəkinmir. Təzə bişmiş çörək, kəsmik, kərə yağı gündəlik qidalanmanın bir hissəsidir — amma həmişə ölçü ilə. Onlar üçün dad porsiyanın ölçüsündən daha vacibdir.

Şirniyyat qadağan deyil və “xüsusi gün”ə saxlanılmır. İstədikdə sadəcə yeyilir. Bu yanaşma psixoloji gərginliyi azaldır və qadağa hissindən yaranan həddindən artıq yeməyin qarşısını alır.

Fransız qadınları hər kaloriyanı hesablamır, bədənlərini dinləyir. Aclıq varsa — yemək lazımdır, zövq varsa — deməli, hər şey qaydasındadır. Beləliklə, təbii balans yaranır.

Gündəlik rasionda şirin içkilər demək olar ki, yoxdur. Qazlı içkilər, şirələr yerinə su və qara qəhvə üstünlük təşkil edir. Bu, “maye kalorilər”dən uzaq durmağa kömək edir.

Fiziki aktivlik var, amma ifrat deyil. Onlar daha çox gəzir, lift əvəzinə pilləkən seçir. Bu sadə vərdişlər davamlı nəticə verir.

Fransız qadınlarının sirri qidada deyil, ona münasibətdədir — daha az nəzarət, daha çox hiss etmək.

DenMedia.az