Vitamin K yaşlılarda əzələ gücünü qorumağa kömək edə bilər

Vitamin K yaşlılarda əzələ gücünü qorumağa kömək edə bilər.

Bu barədə Frontiers in Nutrition jurnalında dərc olunan icmal məqalədə bildirilir. Araşdırma vitamin K ilə sarkopeniya — yəni yaşa bağlı əzələ kütləsi, gücü və dözümlülüyünün azalması arasındakı əlaqəyə həsr olunub. Sarkopeniya yıxılma riskini artırır və insanın müstəqilliyini məhdudlaşdıra bilər.

Məqalədə qeyd olunur ki, adətən qanın laxtalanması ilə əlaqələndirilən vitamin K əslində əzələ toxumasının bərpası, damar sağlamlığı və enerji mübadiləsi ilə bağlı zülalların aktivləşməsində iştirak edir. Eksperimental tədqiqatlarda bu vitaminin iltihabəleyhinə və antioksidant xüsusiyyətlər göstərdiyi, həmçinin hüceyrənin “enerji stansiyası” sayılan mitoxondrilərin fəaliyyətinə təsir etdiyi vurğulanır.

Alimlər bildirirlər ki, orqanizmdə vitamin K səviyyəsi daha yüksək olan insanlarda fiziki göstəricilər və əl sıxma gücü daha yaxşı, funksional məhdudiyyət riski isə daha aşağıdır.

Bununla belə, müəlliflər xəbərdarlıq edirlər ki, vitamin K hələlik sarkopeniyanın qarşısını alan sübut olunmuş vasitə sayılmır. Bunun üçün daha geniş və standartlaşdırılmış klinik tədqiqatlara ehtiyac var.

Denmedia.az