Hüceyrələri “təmir edən” qidalar açıqlandı

Tərəvəzlə və yağlı balıqla zəngin qidalanma təkcə çəkiyə yox, hüceyrələrin yaşlanma sürətinə də təsir edir. Diplomlu ailəvi nutrisioloq və parafarmasevt Yuliya Popova bildirir ki, düzgün rasion insanın bioloji yaşını real şəkildə azalda bilər.

Onun sözlərinə görə, araşdırmalar göstərir ki, 21–25 yaşlı gənclər arasında ultra-emal olunmuş qidalar, şirin içkilər və rafinə edilmiş məhsulları çox qəbul edənlərdə hüceyrə qocalması daha sürətli gedir. Yəni məsələ kosmetik deyil — bu, birbaşa hüceyrə səviyyəsində baş verir.

Popova deyir ki, hüceyrələri “təmir etmək” mümkündür:

“Amin turşuları hüceyrələrin əsas tikinti materialıdır. Yağlar isə hormonların yaranması üçün vacibdir. Hormon balansı olmadan gənclik mümkün deyil. Həftədə iki dəfə yağlı balıq omeqa-3 ehtiyacını ödəyir.”

Mütəxəssis vurğulayır ki, sürətli karbohidratlar, sənaye yarımfabrikatları və qlikasiyanı sürətləndirən məhsullar minimuma endirilməlidir. Qlikasiya — şəkərin zülallara “yapışaraq” toxumaların elastikliyini pozması prosesidir və qocalmanı sürətləndirir.

Əvəzində isə hər qida qəbulunda təzə tərəvəz və lif mənbələri olmalıdır.

Popovanın sözlərinə görə:

– Giləmeyvələr güclü antioksidant mənbəyidir
– Yaşıl çay katexinlərlə hüceyrələri qoruyur
– Zərdəçal və çəmən otu uzunömürlülüklə əlaqəli genlərin aktivliyinə təsir göstərə bilər

Bu, sehrli resept deyil. Bu, metabolik biologiyadır. Hüceyrə nə ilə qidalanırsa, o cür davranır.

DenMedia.az