Kral ailəsində səssiz ayrılıq: Şahzadə Endryu Böyük Britaniyanı tərk etməyə hazırlaşır

Britaniya mediasında yayılan məlumatlara görə, Böyük Britaniya kral ailəsinin üzvü Prince Andrew – şahzadə Endryu ölkəni tamamilə tərk etməyə hazırlaşa bilər. İddialara əsasən, o, uzun müddətdir davam edən ictimai və siyasi təzyiqlər fonunda Britaniyadan kənarda yaşamaq variantını nəzərdən keçirir.

Qeyd olunur ki, şahzadə Endryunun adı Jeffrey Epstein qalmaqalı ilə hallandıqdan sonra onun kral ailəsindəki mövqeyi ciddi şəkildə zəifləyib. O, rəsmi kral vəzifələrindən uzaqlaşdırılıb, hərbi titullarını itirib və ictimai tədbirlərdə iştirak etmir. Faktiki olaraq, şahzadə Endryu kral ailəsinin ictimai həyatından kənarda qalıb.

Məlumatlara görə, Kral III Çarlzın hakimiyyəti dövründə şahzadə Endryu üçün ictimai həyata qayıdış perspektivi yoxdur. Bu isə onun həm şəxsi təhlükəsizliyi, həm də maliyyə və yaşayış məsələləri ilə bağlı qərarlarını yenidən nəzərdən keçirməsinə səbəb olub.

Britaniya KİV-ləri bildirir ki, mümkün köç variantları arasında Körfəz ölkələri, Karib hövzəsi və Avropadan kənar, lakin hüquqi baxımdan təhlükəsiz regionlar yer alır. Bu addım rəsmi şəkildə elan olunmasa da, prosesin pərdəarxasında hazırlandığı iddia edilir.

Mütəxəssislərin fikrincə, şahzadə Endryunun ölkəni tərk etməsi həm onun özü üçün sakit həyat imkanı, həm də kral ailəsi üçün uzun müddətdir davam edən imic probleminin aradan qalxması anlamına gələ bilər.

Hazırda məsələ ilə bağlı rəsmi təsdiq və ya təkzib yoxdur, lakin Britaniya sarayına yaxın mənbələr mövzunun ciddi şəkildə müzakirə olunduğunu istisna etmirlər.

DenMedia.az