Qışda dəriniz quruyursa, bunları etməyin

Qış aylarında dərinin qurumasının qarşısını almaq üçün hamam və saunalara gedişi azaltmaq, həmçinin isti suda çimməkdən imtina etmək tövsiyə olunur. Bu barədə NEWS.ru-ya kosmetoloq İrina Bıstrova bildirib. Onun sözlərinə görə, bu dövrdə aqressiv temperatur təsirləri dərinin susuzlaşmasını daha da gücləndirir.

Mütəxəssis qışda üz dərisini qorumaq üçün bir neçə vacib məqama diqqət çəkib:

• Evdə havanın rütubətini qoruyun. Quru hava dərinin tez qurumasına səbəb olur. Nəmləndiricidən istifadə edin və ya istilik cihazlarının yaxınlığına su qabları qoyun.

• Kəskin temperatur fərqlərindən qaçın. İsti məkandan birbaşa soyuq havaya çıxmaq əvəzinə, orqanizmə uyğunlaşmaq üçün vaxt verin.

• Yetərli miqdarda su için. Bu, orqanizmin ümumi su balansını qorumağa kömək edir.

• Sauna, hamam və isti duşları azaldın.

Kosmetoloqun sözlərinə görə, qış baxımının əsas məqsədi yumşaq təmizləmə və intensiv nəmləndirmə olmalıdır. Üz dərisini gündəlik təmizləyərkən aqressiv tərkibli vasitələrdən uzaq durmaq, yalnız ilıq su ilə yuyunmaq məsləhətdir.

Soyuq havalarda səhər və axşam üz dərisini mütləq təmizləmək lazımdır. Bunun üçün köpük, mus, süd və ya yumşaq gel kimi vasitələrdən istifadə edin. Sabun və spirt tərkibli məhlullar dərini həddindən artıq qurudur və tövsiyə edilmir. Üzü yuduqdan sonra dərini yumşaq dəsmal və ya birdəfəlik salfetlə ehmalca qurulayın.

Həftədə bir dəfə dərin təmizləmə aparmaq olar. Bu, xüsusilə yağlı və qarışıq dəri tipləri üçün faydalıdır. Bunun üçün iri abraziv hissəciklərsiz yumşaq skrablar, enzim və ya kimyəvi pilinqlər, eləcə də mineral maskalar uyğundur.

DenMedia.az