London metrosunda gecə qanla bitdi – 32 yaşlı kişi ailəsinin yanında öldü
London metrosunda baş verən hücum ölümlə nəticələnib. Liverpool Street metro stansiyasında ağır yaralanan 32 yaşlı kişi xəstəxanada göstərilən tibbi yardıma baxmayaraq həyatını itirib.
Britaniya Nəqliyyat Polisinin (BTP) məlumatına görə, hadisə avqustun 30-da yerli vaxtla saat 22:51-də Liverpool Street metro stansiyasında baş verib.
Stansiyada bir nəfərin hücuma məruz qalması barədə məlumat daxil olduqdan sonra əraziyə polis və təcili tibbi yardım briqadaları göndərilib. Hadisə yerində ağır yaralı vəziyyətdə aşkarlanan 32 yaşlı kişi xəstəxanaya çatdırılıb. Onun vəziyyətinin kritik olduğu bildirilib.
Bir müddət xəstəxanada müalicə olunan şəxsi xilas etmək mümkün olmayıb. Britaniya Nəqliyyat Polisi onun ailə üzvlərinin yanında həyatını itirdiyini bildirib.
Ölən şəxsin kimliyi ilə bağlı əlavə məlumat verilməyib. Hadisə ilə bağlı araşdırma davam edir.
Hücumdan sonra polis Barking sakini, 38 yaşlı Ceremaya Maksimo ilə bağlı tədbir görüb. Britaniya vətəndaşı olduğu bildirilən Maksimoya “ağır bədən xəsarəti yetirmə” ittihamı irəli sürülüb.
Onun saxlanıldığı və Highbury Corner Magistrates’ Court məhkəməsinə çıxarılacağı bildirilib. Zərərçəkənin ölümündən sonra ittihamın dəyişdirilib-dəyişdirilməyəcəyi barədə isə hələ məlumat verilməyib.
BTP-nin baş detektiv müfəttişi Sem Blekbern ölən şəxsin yaxınlarına başsağlığı verərək istintaqın davam etdiyini bildirib. O, xüsusilə hadisənin şahidi olmuş, lakin hələ polisə müraciət etməmiş şəxslərdən məlumat vermələrini istəyib.
“Hər bir məlumat bizim üçün həyati əhəmiyyət daşıya bilər”, – Blekbern bildirib.
Britaniya Nəqliyyat Polisi Liverpool Street metro stansiyasındakı hücumun bütün təfərrüatlarını müəyyənləşdirmək üçün araşdırmanı davam etdirir.
