Times Meydanında bıçaqlı hücum: Polis qadını güllələdi
ABŞ-nin Nyu-York şəhərində yerləşən Times Meydanında bıçaqlı hücumdan sonra silah səsləri eşidilib.
“New York Post”un məlumatına görə, bir qadın iki nəfəri bıçaqladıqdan sonra hadisə yerinə gələn polis əməkdaşlarına da bıçaqla tərəf yönəlib. Polis qadının təhlükə yaratdığını nəzərə alaraq atəş açıb və onu vurub.
Hadisə bazar ertəsi saat 16:30 radələrində West 42nd Street və Seventh Avenue yaxınlığında baş verib. İddiaya görə, qadın Times Meydanındakı izdihamın içində bir kişi və bir qadına bıçaqla hücum edib.
Məlumat daxil olduqdan sonra əraziyə polis əməkdaşları göndərilib. Hücum edən qadın NYPD polis məntəqəsinin arxasında əlində bıçaqla aşkarlanıb.
“New York Post”a danışan hüquq-mühafizə mənbələrinin sözlərinə görə, qadın polis əməkdaşlarının qarşısında bıçağı onlara tərəf tuşlayıb. Bundan sonra polis atəş açaraq qadını vurub və zərərsizləşdirib.
Hadisə yerində hücum zamanı istifadə edildiyi ehtimal olunan iri mətbəx bıçağı da tapılıb. Bıçaq Times Meydanında yerləşən suvenir mağazalarından birinin yaxınlığında aşkarlanıb.
Hücumdan sonra həm bıçaqlanan iki nəfər, həm də polis tərəfindən vurulan qadın xəstəxanaya çatdırılıb. Mənbələrin məlumatına görə, hər üç şəxsin vəziyyəti kritikdir.
Hadisədən sonra polis Times Meydanı ətrafında təhlükəsizlik tədbirlərini gücləndirib, bölgədə nəqliyyatın hərəkətində gecikmələr yaranıb. NYPD vətəndaşlara West 42nd Street və Seventh Avenue ətrafından uzaq durmağı tövsiyə edib.
Hadisə ilə bağlı araşdırma davam edir. Hücumun motivi hələlik məlum deyil. NBC New York-un məlumatına görə, polis hücum edən qadını emosional problemləri olan şəxs kimi xarakterizə edib və hadisənin terrorla əlaqəli görünmədiyini bildirib.
