Silahlı şübhəli polisə atəş açdı: Türkiyədə iki zabit həlak oldu

Türkiyənin Tekirdağ vilayətinin Çorlu rayonunda silahlı şübhəli ilə baş verən atışma nəticəsində iki polis əməkdaşı həlak olub.

Bu barədə Hürriyet qəzeti məlumat yayıb.

Nəşrin məlumatına görə, hadisə Reşadiye məhəlləsində yerləşən biznes mərkəzində baş verib.

İnsidentə silahlı dava barədə daxil olan məlumat səbəb olub. Xəbərdən sonra Çorlu polisinin mülki geyimli əməkdaşları hadisə yerinə yollanıblar. Onlar binaya daxil olduqları zaman şübhəli şəxs atəş açıb.

Atışma nəticəsində polis əməkdaşları Erkan Tütünçular və Emrah Koç həyatını itirib.

Hadisə yerinə qısa müddətdə polis və təcili tibbi yardım briqadaları cəlb olunub. Hücum edən şəxs yaralı halda saxlanılıb və Çorlu Dövlət Xəstəxanasına aparılıb.

Əraziyə Tekirdağ valisi Rəcəb Soytürk, Çorlu kaymakamı Niyazi Ertan, Çorlu baş prokuroru Bilgihan Yücel və vilayət polis rəisi Ahmet Metin Turanlı da gəlib.

Türkiyə hakimiyyəti hadisənin bütün təfərrüatlarını araşdırır.

DenMedia.az