Məktəb yoldaşlarını bıçaqlayan HAKİM QARŞISINDA

Bu gün Bakı Ağır Cinayətlər Məhkəməsində hakim Kamil Əliyevin sədrliyi ilə iki həmyaşıdını öldürməyə cəhddə təqsirləndirilən F.H-un cinayət işi üzrə məhkəmə prosesi keçirilib.

DenMedia.az lent.az-a istinadən xəbər verir ki, proses şahid ifadələri ilə davam edib.

Şahid X. M təqsirləndirilən F.H-u tanıdığını bildirib:

"Məktəbdən çıxanda gördüm ki, Nihadla F arasında mübahisə var. F-ın Nahidə neçə bıçaq vurduğunu görmədim. F Nihadla kobud danışdığı üçün Nihad ona şillə vurmuşdu".

Təqsirləndirilən F.H deyilənlərin yalan olduğunu bildirib:

"Əksinə mənim üstümə düşmüşdülər. Mən özümü müdafiə etmək və qorxutmaq niyyəti ilə Malikə 4 bıçaq zərbəsi vurdum. Nadirə isə 1 bıçaq vurdum. Onlar çox idilər. Məcbur idim bıçaqla özümü müdafiə etməyə. Hadisə olan vaxt mənim 16 yaşım var idi".

Daha sonra şahid qismində K.F dindirilib:

"Sinif yoldaşımla sinifdə mübahisəmiz oldu, sonra müəllimimiz bizi barışdırdı. Daha sonra çölə çıxdım F-ı gördüm. Məndən soruşdu ki, niyə kefin yoxdu. Mən də səbəbini izah etdim. Bir gün sonra eşitdim ki, bıçaqlanma hadisəsi baş verib" .

Növbəti məhkəmə iclası mayın 8-nə təyin edilib.

Xatırladaq ki, hadisə ötən ilin oktyabrında paytaxtın Xəzər rayonu ərazisində qeydə alınıb.

Belə ki, 2008-ci il təvəllüdlü F.H iki nəfəri bıçaqlayıb.

Xəstəxanaya çatdırılan zərərçəkmişlərin həyatını xilas etmək mümkün olub.

Ona qarşı Cinayət Məcəlləsinin 29,120.2.7-ci (qəsdən iki və ya daha çox şəxsi öldürməyə cəhd etmə), 29,120.2.2-ci (xuliqanlıq niyyəti ilə adam öldürməyə cəhd) və 29,120.2.4-cü (Qəsdən adam öldürməyə cəhd, zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürməyə cəhd) maddələri ilə ittiham irəli sürülüb.