Məşhur iş adamı lüks hotelin 28-ci mərtəbəsindən yıxılaraq öldü – Son mesajı suallar doğurdu

ABŞ-nin Florida ştatının Sanni-Ayls-Biç bölgəsində yerləşən “Acqualina Resort and Residences” hotelində faciəvi hadisə baş verib.

45 yaşlı Yakir Levi 28-ci mərtəbədən yıxılaraq həyatını itirib. Hadisə yerinə gələn tibbi yardım əməkdaşları onun öldüyünü müəyyən ediblər.

Son mesajı diqqət çəkib

Los-Ancelesdə həyat yoldaşı və 4, 10 və 12 yaşlı üç övladı ilə yaşayan Levinin hadisədən qısa müddət əvvəl görüşəcəyi iki dostuna “Gəlirəm” mesajı göndərdiyi məlum olub.

Yaxınları bu səbəbdən hadisənin intihar ola biləcəyinə inanmadıqlarını bildiriblər.

Levinin yaxın dostu Eran Herş deyib:

“Onlar birlikdə çölə çıxmaq üçün görüşəcəkdilər. Bunun heç bir məntiqli izahı yoxdur. Bir gün əvvəl qayıqda siqar çəkir, həyatının ən gözəl günlərindən birini yaşayırdı”.

Mayami-Deyd Şerif Ofisinin Cinayət Bürosu Levinin mobil telefonunu və çantasını araşdırmaya götürüb. Hadisə hazırda “təsnif edilməmiş ölüm” kimi araşdırılır.

Bununla belə, ilkin polis qeydlərində hadisənin “xəsarətlə nəticələnən intihar” kimi göstərildiyi qeyd olunur.

Səlahiyyətli qurumlar ölümün dəqiq səbəbi və başvermə şəraiti ilə bağlı hələlik yekun açıqlama verməyiblər. Araşdırma davam edir.

İsrailin Ramla şəhərində anadan olan Yakir Levinin cibində cəmi 300 dollarla ABŞ-yə getdiyi, daha sonra təbii fəlakətlər nəticəsində zərər görmüş binaların bərpası ilə məşğul olan şirkət quraraq milyonlarla dollarlıq sərvətə sahib olduğu bildirilir.

Onun uğur hekayəsi İsrailin “Channel 13” kanalında ABŞ-də həyat qurmağa çalışan israillilərdən bəhs edən “The Americans” realiti proqramında da təqdim olunmuşdu.

Levi İsraildə dəfn olunacağı bildirilib.

Denmedia.az