Gizli quyu faciəyə çevrilirdi - qadın möcüzə ilə xilas oldu

Kanadanın Vinnipeq şəhərində xilasedicilər gizli quyunun içinə düşən qadını xilas ediblər. Bu barədə CBC News məlumat yayıb.

Aprelin sonunda dostları Kristin Keylbeki evinə qədər aparıb. Qadın maşından düşərək bir neçə addım atıb və qəfil yoxa çıxıb. Dostları əvvəlcə onun yıxıldığını düşünüb, lakin qadının yerə batdığını görüb. Səthdə yalnız Keylbekin başı və çiyinləri qalıb. O bildirib ki, torpaq birdən ayağının altından çəkilib və hər şey bir anın içində baş verib.

Keylbek özü çıxmağa çalışsa da, torpaq davamlı çökdüyü üçün buna nail ola bilməyib. Sonda dostları xilasediciləri çağırıb. Onun sözlərinə görə, xilasedicilər çox sakit və dəstəkverici davrandıqları üçün o, qorxu hiss etməyib. Qadın tros və qaldırıcı vasitəsilə çıxarılıb və təxminən 40 dəqiqə quyuda qalıb.

Hadisə zamanı o, qorxmaq əvəzinə vəziyyətin qəribəliyinə gülüb. Qadın xəsarət almayıb, lakin sonradan qeyd edib ki, qarın səviyyəsində torpaqdan çıxan iti metal parçasına dəyə bilərdi.

Əvvəlcə torpağın çökməsi güman edilsə də, sonradan məlum olub ki, qadın qapaqsız qalan yağış sularının toplandığı quyuya düşüb. Yolun qarşı tərəfində də eyni cür başqa gizli quyu aşkarlanıb. Hazırda təhlükəli ərazilər hasarlanıb.

DenMedia.az