Tramp İrana dəstək verən ölkələri hədələdi: “Ağır iqtisadi nəticələri olacaq”
ABŞ Prezidenti Donald Tramp maliyyə qurumları, şirkətləri, hava limanları və ya dövlət orqanları vasitəsilə İrana dəstək verən istənilən ölkənin iqtisadi nəticələrlə üzləşəcəyini bildirib. Bu barədə Reuters məlumat yayıb.
Tramp sosial şəbəkədəki paylaşımında Vaşinqtonun İrana pul köçürmələrinə və digər dəstək formalarına qarşı mübarizə aparacağını, həmçinin İran neftinin tədarükünü dayandırmaq niyyətində olduğunu açıqlayıb.
ABŞ prezidenti İrana hər hansı “həyat xətti” verən ölkələrin ciddi iqtisadi nəticələrlə üzləşəcəyini bildirib. O, bununla yanaşı, Vaşinqtonun konkret olaraq hansı iqtisadi tədbirləri tətbiq edəcəyini açıqlamayıb.
Trampın bu açıqlaması ABŞ-ın İranı iqtisadi və maliyyə baxımından daha da təcrid etmək siyasətini sərtləşdirdiyini göstərir. ABŞ artıq İranın neft satışları və maliyyə əməliyyatlarına qarşı geniş sanksiyalar tətbiq edir.
