Tehrandan BMT-yə sərt çağırış: “ABŞ-ın təcavüzü dayandırılmalıdır”
saida
İranın BMT-dəki daimi nümayəndəsi Əmir Səid İrəvani ABŞ, Böyük Britaniya və Fransanın BMT Təhlükəsizlik Şurasının 2231 saylı qətnaməsində nəzərdə tutulan “snapback” — sanksiyaların avtomatik bərpası mexanizmini İrana qarşı yenidən işə salmaq cəhdini hüquqa zidd adlandırıb.
İrəvani Nyu-Yorkda jurnalistlərə açıqlamasında bildirib ki, söhbət Təhlükəsizlik Şurasının prosedur və səlahiyyətlərindən açıq şəkildə sui-istifadədən gedir.
“İranın sözdə ‘snapback’ mexanizmi ilə bağlı mövqeyi aydın və ardıcıl olub. Bu mövqe həm BMT Baş katibinə, həm də Təhlükəsizlik Şurasının sədrinə rəsmi şəkildə çatdırılıb və Çinlə Rusiya tərəfindən dəstəklənib”, — diplomat vurğulayıb.
İrəvani iddia edib ki, ABŞ, Böyük Britaniya və Fransa Birgə Hərtərəfli Fəaliyyət Planı üzrə öhdəliklərini yerinə yetirməyib. Onun sözlərinə görə, həmin ölkələr İranın Beynəlxalq Atom Enerjisi Agentliyinin nəzarətində olan dinc nüvə obyektlərinə hücumlar da daxil olmaqla, Tehrana qarşı qanunsuz hərbi əməliyyatları dəstəkləyiblər.
“Ölkəmiz Fransa, Böyük Britaniya və ABŞ-ın İranın dinc nüvə proqramı ilə bağlı irəli sürdüyü siyasi motivli iddiaları qəti şəkildə rədd edir”, — İrəvani bildirib.
O, bu iddiaları 2231 saylı qətnamənin məzmununu təhrif etmək, faktları yanlış təqdim etmək və Təhlükəsizlik Şurasından dar siyasi məqsədlər naminə istifadə etmək cəhdi kimi qiymətləndirib.
İran nümayəndəsi Tehranın Nüvə Silahlarının Yayılmaması Müqaviləsinə sadiq qaldığını vurğulayıb, eyni zamanda ABŞ və İsrailin hərəkətlərini tənqid edib.
İrəvaninin sözlərinə görə, BMT Təhlükəsizlik Şurası xüsusilə təcavüz, sülhün pozulması və beynəlxalq təhlükəsizliyə təhdid hallarında üzərinə düşən məsuliyyəti yerinə yetirməlidir.
“Təhlükəsizlik Şurası ABŞ-ın qanunsuz təcavüz aktını dayandırmaq və gərginliyin daha da artmasının qarşısını almaq üçün təsirli və qətiyyətli tədbirlər görməlidir”, — diplomat bildirib.
İrəvani əlavə edib ki, ABŞ öz öhdəliklərini tam və vicdanla yerinə yetirəcəyi təqdirdə, Tehran iki ölkə arasında imzalanmış memorandumun icrasına sadiq qalacaq.
