Tehran Vaşinqtonla danışıqları dayandırdı: “Növbəti hücum daha ağır cavabla qarşılanacaq”
saida
Tehran Vaşinqtonla yekun razılaşma üzrə danışıqları dayandırır.
Bu barədə TASS-a yüksək vəzifəli iranlı mənbə məlumat verib. Onun sözlərinə görə, buna səbəb ABŞ tərəfindən səsləndirilən təhdidlər və Vaşinqtonun üzərinə götürdüyü öhdəlikləri dəfələrlə pozmasıdır.
“ABŞ Prezidenti Donald Trampın İran xalqına qarşı birbaşa təhdidləri və Vaşinqtonun öhdəliklərini dəfələrlə pozması səbəbindən İran ABŞ-la yekun sazişin bağlanması üzrə danışıqları dayandırıb”, - deyə mənbə bildirib.
Mənbənin sözlərinə görə, ABŞ-ın İrana qarşı istənilən hərbi təcavüzü əvvəlkilərdən daha genişmiqyaslı və qəti cavabla qarşılanacaq.
O qeyd edib ki, ABŞ öhdəliklərini pozmaqda davam edərək İranın cənub adalarına hücum edib. İran tərəfi bunu İslamabad Anlaşma Memorandumunun açıq-aşkar pozulması kimi qiymətləndirib.
“Bu təcavüzə cavab olaraq İran regionda ABŞ mövqelərinə genişmiqyaslı cavab zərbələri endirib. İran ciddi xəbərdarlıq edib ki, ABŞ-ın bundan sonrakı istənilən hərbi addımı əvvəlkindən daha qəti, daha geniş və daha sərt cavabla qarşılanacaq”, - mənbə vurğulayıb.
Onun sözlərinə görə, Vaşinqtonun təkrar pozuntuları, o cümlədən İran neftinin satışı ilə bağlı razılaşmadakı istisnaları ləğv etməsi cavabsız qalmayacaq.
“İran İslam Respublikası İslamabad razılaşmasının bu kobud pozuntularını cavabsız qoymayacaq və mütənasib cavab veriləcək”, - deyə mənbə əlavə edib.
Mənbə həmçinin bildirib ki, ABŞ Hörmüz boğazı üzrə razılaşmaları da pozub. Bundan sonra həmin strateji su yolunda nəzarətin İranın müəyyən etdiyi qaydalara uyğun həyata keçiriləcəyi qeyd olunub.
Onun sözlərinə görə, ABŞ öhdəliklərini daha da pozaraq Hörmüz boğazında İrana aid olmayan tranzit marşrutunu işə salmağa çalışıb. Tehran bunu İslamabad razılaşmasının 5-ci bəndinə zidd addım hesab edir.
İran memoranduma istinad edərək bu addıma qarşı çıxıb və Hörmüz boğazında hərəkətin yalnız İranın dəniz mexanizmləri əsasında tənzimlənməli olduğunu bildirib.
Mənbə qeyd edib ki, Tehran əvvəllər təhlükəsiz sayılmayan qeyri-İran marşrutları üzrə tranzitə icazə verməkdən imtina edib.
“Tehran vurğulayır ki, bu strateji su yolunda dəniz hərəkətinin idarə olunması ciddi şəkildə İran protokollarına uyğun həyata keçiriləcək”, - deyə TASS-ın həmsöhbəti bildirib.
